ပါကစ္စတန်နိုင်ငံ၊ ဘာလိုချီစတန်ပြည်နယ်ရှိ အာဝါရန်နှင့် ဇော့ဘ်နယ်မြေများတွင် မိုးသည်းထန်စွာရွာသွန်းပြီးနောက် လူ ၁၀ ဦး ထက်မနည်း ရေစီးဖြင့် မျောပါသွားခဲ့ကြောင်း သဘာဝဘေးအန္တရာယ် စီမံခန့်ခွဲရေးတာဝန်ရှိသူများကို ကိုးကား၍ Dawn သတင်းတွင် ဖော်ပြထားသည်။
ရေကြီးရေလျှံမှုကြောင့် သေဆုံးခဲ့သူ ၁၀ ဦးအနက် ၈ ဦးသည် အာဝါရန်မှ ကာလတ်မြို့သို့ မော်တော်ယာဉ်ဖြင့် လိုက်ပါလာသည့် မိသားစုဝင်များ ဖြစ်ကြသည်။
သေဆုံးခဲ့သူများ၏ ရုပ်အလောင်းများကို ရှာဖွေရန် ဒေသခံရဲတပ်ဖွဲ့ဝင်များနှင့် အာဝါရန်မှ အုပ်ချုပ်ရေးမှူးများ ထိုဒေသသို့ သွားရောက်ခဲ့ကြသည်။
ရုပ်အလောင်း ၇ လောင်းကို ပြန်တွေ့ခဲ့ပြီး ဒေသဆိုင်ရာဆေးရုံသို့ ပို့ဆောင်ထားကြောင်း အာဝါရန်မြို့ ဒုတိယရဲမင်းကြီး ဂျမ်မာဒက်ခန်းက Dawn သတင်းဌာနသို့ အတည်ပြုခဲ့သည်။
ကာလတ်မြို့ ဆူရ်ဘတ်ရပ်ကွက်မှ အဆိုပါ မိသားစုသည် နေအိမ်သို့ ပြန်လာချိန်တွင် ယခုကဲ့သို့ ကံကြမ္မာဆိုးနှင့် ကြုံခဲ့ရခြင်းဖြစ်သည်။ သေဆုံးသူ ၈ ဦးအနက် ၇ ဦး၏ ရုပ်အလောင်းများကို ဇာတိမြို့သို့ တာဝန်ရှိသူများက ပို့ဆောင်ပေးခဲ့ကြောင်း ဒုရဲမင်းကြီးက ပြောသည်။
အဆိုပါ ရေကြီးရေလျှံမှုကြောင့် ဇော့ဘ်ဒေသတွင်လည်း လူ ၂ ဦးထက်မနည်း သေဆုံးခဲ့သည်။
မိုးသည်းထန်စွာ ရွာသွန်းမှုကြောင့် နေအိမ်အများအပြား ပျက်စီးခဲ့ကြောင်း ဒေသတွင်း မီဒီယာများတွင် ဖော်ပြထားသည်။
