စစ်ကောင်စီက ဓမ္မစကြာနေ့အထိမ်းအမှတ်အဖြစ် ဩဂုတ်လ ၁ ရက်နေ့တွင် ပြန်လွှတ်ပေးခဲ့ရာ စစ်ကိုင်းတိုင်း ကလေးမြို့အကျဉ်းထောင်မှ အကျဉ်းကျခံနေသူ ၃၆ ဦးလွတ်မြောက်လာကြောင်း ဒေသခံများကပြောသည်။
စစ်ကောင်စီက အကျဉ်းကျခံနေရသူ ၇,၇၄၉ ဦးကိုပြန်လွတ်ပေးရာ ကလေးမြို့အကျဉ်းထောင်မှ အမျိုးသား ၃၁ ဦးနှင့် အမျိုးသမီး ငါးဦး စုစုပေါင်း ၃၆ ဦး လွတ်မြောက်ခဲ့ခြင်းဖြစ်သည်။
“ လိုက်ပြီးစုံစမ်းရသလောက်တော့ နာမည်ကြီး နိုင်ငံရေးအကျဉ်းသား (နိုင်/ကျဉ်း) တွေမပါဘူး။ ဘယ်လိုအမှုတွေ လွတ်တယ်ဆိုတာတော့ သေချာမသိရဘူး ” ဟု အမည်မဖော်လိုသည့် ဒေသခံက ပြောဆိုသည်။
ကလေးမြို့အကျဉ်းထောင်ထဲတွင် PDF – Kalay မှ ဆေးတပ်သားအမျိုးသမီးများ၊ ကျောင်းသားများနှင့် ဆန္ဒပြပွဲဦးဆောင်သူများ အကျဉ်းကျခံနေရဆဲဟု ဆိုသည်။
နိုင်ငံတစ်ဝန်းမှ ပြန်လည်လွတ်မြောက်လာသူများအနက် နိုင်ငံရေးအကျဉ်းသား ၂၁၀ ဦးဝန်းကျင်ကို အတည်ပြုနိုင်ခဲ့ပြီး ၈၂ ဦးကိုသာ အမည်နှင့်တကွအတည်ပြုနိုင်ဆဲဖြစ်ကြောင်း နိုင်ငံရေးအကျဉ်းသားများကူညီစောင့်ရှောက်ရေးအသင်း (AAPP) မှ ဩဂုတ်လ ၃ ရက်တွင် ထုတ်ပြန်ထားသည်။
စာတည်း ။ ။ Alden
စာမူတည်းဖြတ်။ ။သန့်ဇော်(သန်လျင်)