"မမများနဲ့ပွဲကမယ်" အစီအစဉ်သည် အမျိုးသားညီညွတ်ရေးအစိုးရ(NUG) ၏ တရားဝင် ကိုယ်စားလှယ်အဖွဲ့အစည်းဖြစ်သော We Love Myanmar Family(WLMF) ၏ နိုင်ငံတကာရှိ ရန်ပုံငွေရှာဖွေသူများနှင့် ၂၀၂၂ ခုနှစ် ၊ မေလ ၂၆ ရက်နေ့က စတင်ခဲ့သော ပရောဂျက်ဖြစ်သည်။
ထိုအချိန်မှစတင်ကာ အစီအစဉ် လေးကြိမ်ကို အောင်မြင်စွာပြုလုပ်နိုင်ခဲ့ပြီး ဒေသအလိုက် စစ်မျက်နှာဖွင့်ထားသည့် နေရာများတွင် လက်နက်ကြီးတပ်ဆင်နိုင်ရေးအတွက် ကြိုးပမ်းကာ ကရင်နီဒေသ၊ စစ်ကိုင်းဒေသ၊ ချင်း မကွေးနှင့် အလယ်ပိုင်းဒေသတို့အတွက် ဘဏ္ဌာငွေရှာဖွေခဲ့ရာ အစီအစဉ်များမှ ဒေါ်လာ ၁ ဒသမ ၉၈ သန်း ရရှိထားကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနမှ ထုတ်ပြန်ထားသည်။
ယခုအခါတွင် ငါးကြိမ်မြောက်အစီအစဉ်ကိုလည်း စတင်နေကာ လက်ရှိ တိုက်ပွဲဖော်ဆောင်နေပြီဖြစ်သော နေပြည်တော်အတွက် "နေပြည်တော်ကို ဝိုင်းပတ်လို့၊ မမများနဲ့ပွဲကစို့" ကျပ်သိန်း ၁၀,၀၀၀ ပရောဂျက်အကြောင်း "မမများနဲ့ပွဲကမယ်" ပရောဂျက် တာဝန်ခံ ဂူးကို မဇ္ဈိမမှ ဆက်သွယ်မေးမြန်းထားသည်။
