မန္တလေးမြို့နေ ဓါတ်ပုံဆရာတစ်ဦးမှာ ဖေဖော်ဝါရီ ၁၉ရက်၊ ညနေက စစ်ကောင်စီတပ်ဖွဲ့၏ အကြမ်းဖက်ဖမ်းဆီးခံရပြီးနောက်ပိုင်း နာရီပိုင်းအတွင်းမှာပင် သေဆုံးသွားသည်။ 
မဟာအောင်မြေမြို့နယ်၊ ၈၂ လမ်းနှင့် ၄၄လမ်း၊ မဟာမုနိဘုရားကြီးအနီးရှိ နေအိမ်တွင် ညနေ ၆နာရီခန့်က ဓါတ်ပုံဆရာ ကိုအောင်ဝင်းထွဋ်(ခ)ကိုအောင်(ဆောင်းနှင်းဖြူ)ကို စစ်ကောင်စီမှ သေနတ်ပစ်ဖောက် ရိုက်နှက် ဖမ်းဆီးသွားခဲ့သည်။ ည ၉နာရီ၌ သေဆုံးသွား​၍ အလောင်းလာထုတ်ယူရန် မိသားစုထံ အကြောင်းကြားခဲ့ခြင်းဖြစ်သည်။
"ဘာကြောင့် ဖမ်းတယ်ဆိုတာမသိရဘူး။စစ်ကားနဲ့လာပြီး သေနတ် နှစ်ချက်ဖောက် ဖမ်းသွားတာပဲ။အလောင်းကို ဆေးရုံကြီးပို့လိုက်ပြီး အ​ဲဒီမှာ အလောင်းသွားထုတ်ပါလို့ အကြောင်းကြားတယ်။"ဟု မိသားစုနှင့်နီးစပ်သူ တစ်ဦးကပြောသည်။
သေဆုံးသူနှင့်လုပ်ဖော်ကိုင်ဘက် တစ်ဦးကလည်း"ပျော်ပျော်နေတတ်တဲ့သူ တက်ကြွတဲ့သူ။သူဟာ သူ့အလုပ်သူ ရိုးရိုးသားသား လုပ်နေသူ။ဒီလိုလူကို ဖမ်းပြီး သတ်လိုက်တာ ပြောဖို့ စကားမရှိတော့ဘူး။သိပ်ဝမ်းနည်းဖို့ကောင်းတယ်။"ဟုပြောသည်။
သေဆုံးသူ အဖမ်းခံရသည့် ညမှာပင် မဟာမုနိဘုရားကြီး အနီးရှိ ရပ်ကွက် များမှ  လူငယ်တစ်ချို့လည်း ဖမ်းဆီးခံခဲ့သည်။
သေဆုံးသွားသူ ကိုအောင်ဝင်းထွဋ်၏ အလောင်းကို ဆေးရုံကြီးမှ ထုတ်ယူပြီး ဖေဖော်ဝါရီ ၂၁ရက်၊မွန်းလွဲပိုင်းတွင် သင်္ဂြ ိုလ်ခဲ့ကြောင်းသိရသည်။
သေဆုံးသွားသူ ကိုအောင်ဝင်းထွဋ်သည် မန္တလေးတက္ကသိုလ် ကျောင်းသားဟောင်းဖြစ်ပြီး ဓါတ်ပုံ၊ဗီဒီယိုရိုက်ကူးခြင်းဖြင့် အသက် မွေးဝမ်းကြောင်းနေသူဖြစ်ကြောင်းသိရသည်။
ဓါတ်ပုံ- သေဆုံးသူ ကိုအောင်ဝင်းထွဋ်(ခ)ကိုအောင်(ဆောင်းနှင်းဖြူ)