ကြားဖြတ်ရွေးကောက်ပွဲကျင်းပမည့် တမူးမြို့၌ မဲစာရင်း ကောက်ယူပြီးစီး

.

၂၀၁၇ ခုနှစ်။ ကြားဖြတ်ရွေးကောက်ပွဲ၌ မုံရွာမြို့တွင် မဲဆွယ်စည်းရုံးနေကြစဉ်။

မုံရွာ၊ ဇွန် ၃၀။                                       ။ ၂၀၁၈ ခုနှစ် နိုဝင်ဘာလအတွင်း ကျင်းပမည့် ကြားဖြတ်ရွေးကောက်ပွဲ၌ တမူးမြို့တွင် မဲပေးပိုင်ခွင့်ရှိသော မဲစာရင်းများ ကောက်ယူပြီးစီးပြီဖြစ်ကြောင်း စစ်ကိုင်းတိုင်းဒေသကြီးရွေးကောက်ပွဲကော်မရှင်အဖွဲ့ခွဲမှ သိရသည်။

၂၀၁၈ ခုနှစ်၊ ဧပြီလ ၁၄ ရက်နေ့မှ မေလ ၂၄ ရက်နေ့ထိ လစ်လပ်လျှက်ရှိသော မဲဆန္ဒနယ်အတွင်း၌ မဲစာရင်းများ ကောက်ယူခြင်း၊ စာရင်းများပြုစုခြင်း၊ မဲပေးပိုင်ခွင့်ရှိသူများကို စိစစ်ခြင်းများ ပြုလုပ်ခဲ့ပြီးဖြစ်ကြောင်း သိရသည်။

"ပထမအကြိမ်အဖြစ် ၂ ပတ်ကြာ ကြေညာပေးထားမှာ ဖြစ်ပါတယ်။ သက်ဆိုင်ရာ ရပ်ကွက် ကျေးရွာ ရွေးကောက်ပွဲ ကော်မရှင်အဖွဲ့ခွဲ ရုံးတွေမှာ တရားဝင်ထုတ်ပြန်ကြေညာပေးထားမှာဖြစ်ပါတယ်။" ဟု စစ်ကိုင်းတိုင်းဒေသကြီး ရွေးကောက်ပွဲကော်မရှင်အဖွဲ့ခွဲ ဥက္ကဋ္ဌ ဦးတင်ဦးက ပြောသည်။

ယခုလာမည့် ဇူလိုင်လ ၉ ရက်နေ့မှစတင်ကာ ၂၂ ရက်နေ့ထိ ၁၄ ရက်ကြာ မဲစာရင်းကြေညာပေးထားမည်ဖြစ်ပြီး သက်ဆိုင်ရာ ရပ်/ကျေး အုပ်ချုပ်ရေးမှူးရုံး များတွင် ထုတ်ပြန်ကြေညာပေးမည်ဖြစ်သည်။

တမူးမြို့နယ် မဲဆန္ဒနယ်အမှတ် ၂ တိုင်းဒေသကြီးလွှတ်တော်ကိုယ်စားလှယ် ဦးထန်ခိုဟောက်မှာ ၂၀၁၇ ခုနှစ်၊ ဇွန် ၂၉ ရက်က ကွယ်လွန်သွားသည့်အတွက် ၄င်းနေရာသည် လစ်လပ်နေခြင်းဖြစ်သည်။

၂၀၁၅ ခုနှစ် အထွေထွေရွေးကောက်ပွဲ၌ တမူးမြို့နယ်၊ မဲဆန္ဒနယ်အမှတ်(၂)တွင် မဲပေးပိုင်ခွင့်ရှိသူ ၃၂၁၅၈ ဦး ရှိခဲ့ပြီး ၂၀၁၈ ခုနှစ် ကြားဖြတ်ရွေးကောက်ပွဲတွင် ၂၀၀၀ ခန့် တိုးလာကြောင်း   ရွေးကောက်ပွဲ ကော်မရှင်အဖွဲ့ခွဲဥက္ကဋ္ဌ ဦးတင်ဦးက ဆက်လက် ပြောခဲ့သည်။

၂၀၁၇ ခုနှစ်၊ ဧပြီ ၁ ရက်က ကျင်းပခဲ့သော ကြားဖြတ်ရွေးကောက်ပွဲ၌ စစ်ကိုင်းတိုင်းဒေသကြီး အတွင်း မုံရွာ မြို့နယ်၊ ပြည်သူ့လွှတ်တော်ကိုယ်စားလှယ် တစ်နေရာသာလစ်လပ်ခဲ့ပြီး ယခုကျင်းပမည့် ကြားဖြတ် ရွေးကောက်ပွဲတွင်လည်း တမူးမြို့နယ်၊ တိုင်းဒေသကြီးမဲဆန္ဒနယ်အမှတ်(၂) တစ်နေရာတည်းသာ လစ်လပ်ခဲ့သည်။

တမူးမြို့နယ်၊ မဲဆန္ဒနယ်အမှတ်(၂) တိုင်းဒေသကြီး လွှတ်တော်ကိုယ်စားလှယ်နေရာသည် ရပ်ကွက် ၅ ခုနှင့်၊ ကျေးရွာ ၁၅ ရွာတို့ ပါရှိပြီး မဲရုံ ၃၈ ရုံ ပြုလုပ်ထားမည်ဖြစ်ကြောင်း သိရသည်။