ကုလသမဂ္ဂ၏ မြန်မာနိုင်ငံဆိုင်ရာ သံအမတ်အဖြစ် ဦးကျော်မိုးထွန်း ဆက်လက်တာဝန်ယူထားသည်ဟု RFA က ဖော်ပြသည်။
အထွေထွေညီလာခံဥက္ကဋ္ဌရဲ့ ပြောရေးဆိုခွင့်ရှိသူ မော်နီကာ ဂရေးလီ (Monica Grayley)က RFA ကို စက်တင်ဘာလ ၂၁ ရက်နေ့က အတည်ပြုပြောကြားခြင်းဟု သတင်းတွင် ဖော်ပြထားသည်။
အဖွဲ့ဝင်နိုင်ငံများက စေလွှတ်သည့် ကုလသမဂ္ဂအမြဲတမ်း သံအမတ်ကြီးရာထူးကို ကုလသမဂ္ဂဆိုင်ရာနိုင်ငံကိုယ်စားလှယ် ခန့်ထားရေး စိစစ်သည့် "ကုလသမဂ္ဂ နိုင်ငံကိုယ်စားပြု ကိုယ်စားလှယ်စိစစ်ရေးကော်မတီ" (Credential Committee) က နှစ်စဉ် ဆုံးဖြတ်အတည်ပြုပေးရခြင်းဖြစ် သည်။
အခုနှစ်အတွက် ပြန်လည်ဖွဲ့စည်းထားသည့် ကော်မတီအသစ်မှာ စက်တင်ဘာ ၅ ရက်နေ့ကတည်းက တစ်ကြိမ်တစ်ခါမှ အစည်းအဝေးထိုင် ဆုံးဖြတ်ခြင်း မရှိသေးသဖြင့် ပြီးခဲ့တဲ့နှစ်က အတည်ပြုထားသည့် နိုင်ငံများ၏ ကိုယ်စားလှယ် များမှာ ဆက်လက်တာ၀န်ယူရခြင်းဟုအထွေထွေညီလာခံဥက္ကဋ္ဌ၏ပြောရေးဆိုခွင့်ရှိသူ မော်နီကာ ဂရေးလီ (Monica Grayley)က ပြောသည်။
ဗြိတိန်နိုင်ငံအခြေစိုက် မြန်မာ့အရေးလှုပ်ရှားသည့် Myanmar Accountability Project အဖွဲ့က သံအမတ်ကြီး ဦးကျော်မိုးထွန်းကို မြန်မာနိုင်ငံကိုယ်စားပြုအဖြစ် သက်တမ်းတိုး လိုက်ခြင်းအပေါ် ထောက်ခံကြိုဆိုကြောင်း ကြေညာချက် ထုတ်ပြန်သည်။
ဦးကျော်မိုးထွန်းအား မြန်မာသံအမတ်အဖြစ် ဆက်လက်ထားရှိရန် မြန်မာနိုင်ငံတဝှမ်းတွင် နေ့စဉ်ဆန္ဒထုတ်ဖော်ကာ မြန်မာ ပြည်သူများက တောင်းဆိုခဲ့သည်။
