ကချင်ပြည်နယ်၊ ရွှေကူမြို့နယ်ကို မတ်လ ၃၀ ရက်နေ့တွင် စစ်ကောင်စီတပ်က လေကြောင်းဖြင့်တိုက်ခိုက်ခြင်းကြောင့် နေအိမ် နှစ်လုံးမီးလောင်ပျက်စီးခဲ့ပြီး ကျန်ရှိသည့်နေအိမ်များအား စစ်ကောင်စီတပ်ဖွဲ့ဝင်များက ဆက်လက်မီးရှို့ရာ နေအိမ် ၁၀၀ ထက်မနည်း မီးလောင်ပျက်စီးခဲ့ပြီး စပါးကျီများစွာ မီးလောင်ပျက်စီးခဲ့ကြောင်း Shwegu KPDF က ယနေ့ မတ်လ ၃၁ ရက်နေ့တွင် သတင်းထုတ်ပြန်သည်။
"တပ်မ (၈၈) လက်အောက်ခံ ခလရ (၁၀)၊ ခလရ (၇၇)၊ ခလရ (၈၈) အကြမ်းဖက်စစ်ကြောင်းတွေရဲ့ ထပ်မံ မီးရှို့ဖျက်ဆီးမှုများကြောင့် မံဝိန်းကျေးရွာမှာရှိတဲ့ လူနေအိမ် ၁၀၀လုံးထက်မနည်း မီးလောင်ပျက်စီးခဲ့တာပါ"ဟု Shwegu KPDF ကဆိုသည်။
မတ်လ ၃၀ ရက်နေ့ ၊ ညကလည်း ရွှေကူမြို့၊ ရဲစခန်းအနီးမှာတပ်စွဲနေသည့်စစ်ကောင်စီတပ်ဖွဲ့ဝင်တွေကို ကာကွယ်ရေးတပ်ဖွဲ့ဝင်တွေက ပစ်ခတ်တိုက်ခိုက်ခဲ့ပြီး စစ်ကောင်စီဘက်က ရမ်းသန်းပစ်ခတ်မှုတွေ ပြုလုပ်ခဲ့ကြောင်းမြို့ခံတစ်ဦးက ပြောသည်။
မတ်လ ၃၀ ရက်နေ့ည၊ ရွှေကူမြို့၊ ရဲစခန်းအနီးတိုက်ပွဲဖြစ်စဉ်နှင့်ပတ်သက်ပြီး မဇ္ဈိမက သီးခြားအတည်ပြုနိုင်ခြင်း မရှိသေးပေ။
ကချင်ပြည်နယ်၊ ရွှေကူမြို့နယ်ကို မတ်လ ၂၃ ရက်နေ့မှစတင်ကာ ရွှေကူမြို့နယ် အရှေ့ဘက်ခြမ်းရှိ မံဝိန်း၊ ငှက်တံတား၊ ဝင်ဝ၊ စီသောင်၊ စီမူလေး စသည့်ကျေးရွာများအား စစ်ကောင်စီတပ်မ (၇၇) ၊ တပ်မ (၁၀) ပူးပေါင်းတပ်တို့က စစ်ကြောင်းထိုးဝင်ရောက်ခဲ့တာကြောင့် ဒေသခံကာကွယ်ရေးတပ်တွေနှင့် ထိတွေ့တိုက်ပွဲများ ယနေ့အထိဖြစ်ပွားနေပြီး ကျေးရွာနေ ပြည်သူများသည် ရွှေကူမြို့ပေါ်သို့ ထွက်ပြေးတိမ်းရှောင်နေကြကြောင်း သိရသည်။
စာတည်း- သန့်ဇော်(သန်လျင်)
