ကချင်ပြည်နယ်၊ လိုင်ဇာမြို့ မုန်လိုင်ခက် စစ်ဘေးရှောင်စခန်းကို တိုက်ခိုက်မှုသည် စစ်ခေါင်း ဆောင် ဗိုလ်ချုပ်မှူးကြီးမင်းအောင်လှိုင်က “မလုပ်ရဲတာဘာမှမရှိ” ဟု ပြောခဲ့သည့်စကားကို လက်တွေ့ အကောင်အထည်ဖော်လိုက်ခြင်းဖြစ်ကြောင်း ချင်းအမျိုးသားတပ်ဦး(CNF)မှ အောက်တိုဘာလ ၁၁ ရက် ယမန်နေ့က ထုတ်ပြန်ထားသည်။
ယင်းသို့တိုက်ခိုက်မှုကို စက်ဆုပ်ဖွယ်ရာလုပ်ရပ်ဖြစ်ပြီး အင်မတန်ကြီးလေးသော စစ်ရာဇဝတ်မှုကို ချိုး ဖောက်ခြင်းဖြစ်သည့် လူမျိုးသုဥ်းသတ်ဖြတ်မှုဖြစ်သည်ဟု CNF က ဆိုသည်။
စစ်ကောင်စီတပ်ဖွဲ့က မုန်လိုင်ခက်စစ်ဘေးရှောင်စခန်းကို လေကြောင်းနှင့်လက်နက်ကြီးများဖြင့် ရည် ရွယ်ချက်ရှိရှိ အောက်တိုဘာလ ၉ ရက် ည ၁၁ နာရီ ၃၀ မိနစ်ခန့်တွင် တိုက်ခိုက်ခဲ့သည့်အပေါ် CNF က အပြင်းအထန်ရှုတ်ချကြောင်း ထုတ်ပြန်ချက်တွင် ဖော်ပြထားသည်။
အဆိုပါ ဗုံးကြဲပစ်ခတ်မှုကြောင့် ကလေးသူငယ်နှင့်အမျိုးသမီးများအပါအဝင် ဒေသခံ ၃၀ ကျော် အသက် ဆုံးရှုံးခဲ့ပြီး ၅၀ ဦးထက်မနည်း ဒဏ်ရာရရှိခဲ့သဖြင့် နစ်နာသူ အပြစ်မဲ့ပြည်သူများ၊ ကချင်ပြည်သူများနှင့် အတူ ထပ်တူထပ်မျှ ဝမ်းနည်းကြေကွဲကြောင်း ဆိုသည်။
အကြမ်းဖက်မှုကို ကျူးလွန်နေသော စစ်ကောင်စီအုပ်စုအား နည်းလမ်းပေါင်းစုံဖြင့် ဝိုင်းဝန်းပြီး ဖယ်ကြဉ်၊ ကန့်ကွက် အပြစ်ပေးကြပါရန် CNF က တောင်းဆိုထားသည်။
ပြည်သူ၏ရန်သူဖြစ်သော စစ်ကောင်စီကို ကချင်ညီနောင်များနှင့်အတူ ဆက်လက်တိုက်ခိုက်ချေမှုန်းသွား မည်ဖြစ်ပြီး နိုင်ငံရေးခံယူချက် ဦးတည်ချက်တူသော တိုင်းရင်းသားညီနောင်မဟာမိတ်များ၊ NUG အစိုးရ ၊ နွေဦးလက်နက်ကိုင်အင်အားစုများနှင့်အတူ ပြည်သူလူထုဖက်မှရပ်တည်ပြီး အဆုံးတိုင် တိုက်ပွဲဝင်သွား မည်ဖြစ်ကြောင်း ချင်းအမျိုးသားတပ်ဦး၏ကြေညာချက်တွင် ဖော်ပြထားသည်။
မုန်လိုင်ခက် စစ်ဘေးရှောင်စခန်းကို တိုက်ခိုက်မှုအပြီး နောက်ရက် အောက်တိုဘာလ ၁၀ ရက်နေ့ မွန်းလွဲ ၁၂ နာရီ ၅၁ မိနစ်နှင့် ၂ နာရီ ၅၈ မိနစ်တို့တွင် စစ်ကောင်စီက ချင်းပြည်နယ် ထန်တလန်မြို့ကို လေယာဥ် ဖြင့် နှစ်ကြိမ်ဗုံးကြဲခဲ့ကြောင်း ဒေသတွင်းသတင်းရင်းမြစ်များထံမှ သိရသည်။
ဒေသခံများနေထိုင်ခြင်းမရှိသည့် ထန်တလန်မြို့တွင် စစ်ကောင်စီတပ်နှင့် ချင်းကာကွယ်ရေးတပ်ဖွဲ့များ သာနေထိုင်ပြီး ထိတွေ့တိုက်ပွဲဖြစ်ပြီးနောက် လေကြောင်းမှ နှစ်ကြိမ်၊ ဗုံးခြောက်လုံးကြဲချခဲ့သော်လည်း ထိခိုက်မှုမရှိခဲ့ဟု ကာကွယ်ရေးတပ်ဖွဲ့ဝင်များထံမှသိရကြောင်း သတင်းရင်းမြစ်က ပြောကြားသည်။
စာတည်း။ ။စောဖေ
