ရန်ကုန်၊ အောက်တိုဘာလ ၁၂ ရက်၊ ၂ဝ၁၆ ။ ။ ရန်ကုန်မြို့၊ လမ်းမတော်မြို့နယ်၊ အမှတ် ၃ ရပ်ကွက်၊ အနော်ရထာလမ်း၊ ၇ လမ်းနှင့် ၈ လမ်းကြားရှိ အမှိုက်ပုံး အနီးတွင် ၉ မမ ကျည်ဆံများကို သေတ္တာတစ်လုံးဖြင့် ယနေ့ အောက်တိုဘာလ ၁၂ ရက် နံနက် ပိုင်းက တွေ့ရှိခဲ့ ကြောင်း လမ်းမတော်မြို့နယ်ရဲစခန်းမှ အမှုစစ်တာဝန်မှူး ဒုရဲအုပ် ဦးဆန်းကိုကိုက မဇ္ဈိမကို ပြောသည်။
" အဲ့ဒါကတော့ အနော်ရထာလမ်း ၇လမ်းနဲ့ ၈လမ်းကြားမှာ အမှိုက်ပုံး အနီးမှာ တွေ့တယ်ဆိုပြီးတော့ စည်ပင်သန့်ရှင်းရေး ဝန်ထမ်း က လှမ်းပြီး အကြောင်းကြားလို့ ကျွန်တော်တို့ မြို့နယ်မှူးနဲ့အဖွဲ့တွေ သွားရောက် စစ်ဆေး ခဲ့ပါတယ် "ဟု ၎င်းက ဆိုသည်။
အဆိုပါ သေတ္တာကို ယနေ့ နံနက် ၉နာရီခွဲခန့်တွင် လူငယ် ၂ ဦးက လာရောက်စွန့်ပစ်ခဲ့ခြင်းဖြစ်ပြီး သေတ္တာ ထဲ တွင် ၉ မ.မ ကျည်ဆံထုပ်ကို တွေ့ရှိခဲ့ခြင်းဖြစ်ကြောင်း ဒုရဲအုပ် ဦးဆန်းကိုကိုက အတည်ပြု ပြောကြားသည်။
အဆိုပါ ဖြစ်စဉ်နှင့် ပတ်သက်၍ " ၈ လမ်း၊ အိမ်အမှတ် ၇၄ (B) ၊မှ မနီ ဆိုသူ အမျိုးသမီးတစ်ဦးမှ အဆိုပါ ကျည်ဆံများသည် သူမ၏ အမျိုးသား ဗိုလ်မှူး မျိုးညွန့်အောင် (ကုန်သွယ်လယ်ယာ) ဆိုသူ၏ ပစ္စည်းများဖြစ်သည်ဟု ပြောကြားခဲ့ကြောင်း လူမှုကွန်ရက်များတွင် ရေးသားထားကြသော်လည်း လက်ရှိတွင် စစ်ဆေးဆောင်ရွက်နေကြောင်း၊ အတည်မပြုရသေးသည့်အတွက် ပြောဆို၍ မရသေးကြောင်း ဒုရဲအုပ် ဦးဆန်းကိုကိုက ပြောသည်။
