စစ်ကိုင်းတိုင်း၊ ယင်းမာပင်မြို့နယ်၊ ရင်ပေါင်တိုင်ကျေးရွာကို စစ်ကောင်စီတပ်က စစ်ကြောင်းထိုး ဝင်ရောက်လာသည့်အတွက် ဒေသခံများထွက်ပြေးနေရကြောင်း သိရသည်။
အောက်တိုဘာလ ၂၂ ရက် ယနေ့ နံနက်အစောပိုင်းတွင် စစ်ကောင်စီစစ်ကြောင်းက ကျေးရွာအတွင်းသို့ လက်နက်ကြီးလက်နက်ငယ်များဖြင့်ပစ်ခတ်ပြီး ဝင်ရောက်ခဲ့ခြင်းဖြစ်ကြောင်း ဒေသခံတဦးက ပြောသည်။
“မနေ့က ရင်ပေါင်တိုင်နဲ့ချောင်းပဲခြားတဲ့ ပုလဲမြို့နယ်ဖက်ကရွာတွေကိုဝင်နေပြီဆိုကတည်းက ရွာကလူ တွေ အကုန်ရှောင်နေကြတာ၊ ဒါကြောင့်ဒေသခံတွေ ပိတ်မိနေတာမျိုးမရှိဘူး” ဟု ရင်ပေါင်တိုင်ရွာခံတဉီး က ပြောသည်။
အဆိုပါ စစ်ကောင်စီစစ်ကြောင်းသည် ပြီးခဲ့သည့်ရက်ပိုင်းက ယင်းမာပင်မြို့နယ် သဲကုန်းရွာ၌ အမျိုးသား ခြောက်ဦးကို ရက်ရက်စက်စက်သတ်ဖြတ်သွားသည့် စစ်ကြောင်းဖြစ်ကြောင်းဖြစ်ပြီး ယင်းမာပင်နှင့် ပုလဲ မြို့နယ်ကို လှည့်ပတ်စစ်ကြောင်းထိုးနေခြင်းဖြစ်ကြောင်း ဒေသခံတစ်ဦးက ဆိုသည်။
ယနေ့ အောက်တိုဘာလ ၂၂ ရက်နေ့ ညနေပိုင်းအထိ ၎င်းစစ်ကြောင်းသည် ရင်ပေါင်တိုင်ရွာအတွင်း တပ်စွဲ ထားပြီး ရွာအတွင်းမှ အခြေအနေကို မသိရသေးကြောင်း ဒေသခံတဦးက ပြောသည်။
“ အခုထိတော့ ရွာထဲမှာပဲရှိသေးတယ်။ ဘာတွေလုပ်သွားလဲဆိုတာတော့ သူတို့ ထွက်သွားမှသိရမှာပဲ” ဟု ၎င်းကပြောသည်။
ကျားဘီလူးစစ်ကြောင်းဟုကြွေးကြော်ကာ လူမဆန်သည့်လုပ်ရပ်များကို ဆောင်ရွက်နေသည့်အတွက် သတိဖြင့်သွားလာနေထိုင်ပြီး စစ်ကြောင်းထိုးလာပါက ဘေးလွတ်ရာသို့ တိမ်ရှောင်ကြရန်လိုအပ်ပြီး ကျေးရွာများအတွင်းသို့ ပြန်လည်ဝင်ရောက်မည်ဆိုပါကလည်း ဒေသကာကွယ်ရေးတပ်ဖွဲ့များ နယ်မြေ ရှင်းလင်းရေးလုပ်ဆောင်ပြီးမှသာ ဝင်ရောက်ကြရန် ပြည်သူ့အုပ်ချုပ်ရေးအဖွဲ့များက သတိပေးထားသည်။
စာတည်း။ ။စောဖေ
