ကရင်နီအမျိုးသားများကာကွယ်ရေးတပ်(KNDF) တပ်ရင်း(၅)တွင် အမျိုးသမီးစစ်သည်များ လည်း တာဝန်ထမ်းဆောင်နေကြပြီး တပ်ဖွဲ့အတွင်း အမျိုးသမီးပါဝင်မှု ၄၀ ရာခိုင်နှုန်းခန့်ရှိကြောင်း တာဝန်ရှိသူတဦးက ပြောသည်။
KNDF တပ်ရင်း(၅) တပ်ခွဲ(၄) သည် KNDF ၏ ပထမဆုံး အမျိုးသမီးတပ်ခွဲအဖြစ် တိုက်ပွဲဝင်လာသည်မှာ တနှစ်ကျော်ရှိပြီဖြစ်ကြောင်း အမျိုးသမီးစစ်သည်တော်များ စစ်ရေးလေ့ကျင့်နေသည့်ဓာတ်ပုံများကို အောက်တိုဘာလ ၉ ရက်နေ့တွင် ထုတ်ပြန်လာသည်။
“ရှေ့တမ်းစစ်မျက်နှာပြင်မှာ ပါ၀င်တာတွေ ရှိပါတယ်။ မီဒီယာမှာချမပြခဲ့တာတွေလည်း ရှိတာပေါ့။ အခြား Drone အဖွဲ့နဲ့ ဆေးအဖွဲ့တွေသာမက နိုင်တဲ့နေရာကနေ ပါ၀င်ကြပါတယ်။ တပ်ဖွဲ့အတွင်း အမျိုးသမီး ပါဝင်မှုကတော့ ၄၀ ရာခိုင်နှုန်းလောက်ရှိပါတယ်” ဟု KNDF တပ်ရင်း(၅)မှတာဝန်ရှိသူတဦးက မဇ္ဈိမကို ပြောသည်။
“အမျိုးသမီးတွေခံစားခဲ့ရတဲ့ အကြမ်းဖက်မှုတွေ၊ ဖိနှိပ်မှုတွေ ၊ ခွဲခြားဆက်ဆံမှုတွေအတွက် နောင်တချိန် ဖယ်ဒရယ်စနစ်ထူထောင်သွားတဲ့အခါမှာ နိုင်ငံရေးစကားဝိုင်းတွေ၊ ညှိနှိုင်းမှုတွေ၊ မူဝါဒတွေ ရေးဆွဲတဲ့အခါ မှာ အမျိုးသမီးတွေပါဝင်နိုင်ဖို့ ဆက်ပြီးကြိုးစားရမှာ ဖြစ်ပါတယ်။ အမျိုးသမီးများရဲ့ အခွင့်အရေး၊ ခံစားပိုင် ခွင့်ရရှိဖို့က အမျိုးသမီးတွေမှာပဲ တာဝန်ရှိတာမဟုတ်ဘဲ အမျိုးသားတွေလည်း တကယ့်လူမှုဘဝမှာ ကြိုး စားပေးဖို့အများကြီး လိုအပ်ပါတယ်” ဟု KNDF တပ်ရင်း(၅)၏ ထုတ်ပြန်ချက်တွင် ဖော်ပြထားသည်။
စာတည်း။ ။စောဖေ
