စစ်ကိုင်းတိုင်း၊ တမူးမြို့နယ်တွင် ဩဂုတ်လ ၂၈ ရက်နေ့က စစ်ကောင်စီတပ်စခန်းတခုကို ကာကွယ်ရေးတပ်ဖွဲ့က သွားရောက်တိုက်ခိုက်ခဲ့ကြောင်း သိရသည်။
တမူးမြို့နယ်၊ ထင်းဇင်နှင့် ဘုက္ကန်ကျေးရွာအကြားရှိ Y.C.D.C ကုမ္ပဏီ ကျောက်မီးသွေးဝင်းအတွင်း အင် အား ၆၀ ခန့်ဖြင့် အထိုင်ချထားသည့် စစ်ကောင်စီတပ်စခန်းကို နံနက် ၇ နာရီခန့်တွင် ကာကွယ်ရေးတပ်ဖွဲ့ က သွားရောက်တိုက်ခိုက်ခဲ့ခြင်းဖြစ်သည်။
တိုက်ပွဲအတွင်း စစ်ကောင်စီတပ်သားတဦးသေဆုံး၍ အများအပြားဒဏ်ရာရရှိကာ NLA ဘက်မှ ရဲဘော် တဦး မစိုးရိမ်ရဒဏ်ရာရရှိခဲ့ကြောင်း သိရသည်။
အဆိုပါတိုက်ပွဲအတွင်း စစ်ကောင်စီတပ်က လေကြောင်းမှ တိုက်ခိုက်မှုများပြုလုပ်ခဲ့ကြောင်းအမျိုးသား လွတ်မြောက်ရေးတပ်တော်(NLA)တာဝန်ရှိသူက ပြောသည်။
“ထိတွေ့တိုက်ပွဲအတွင်းမှာ MI 35 နဲ့ လေကြောင်းပစ်ကူ နှစ်ကြိမ်လာပါတယ်။ ဒုတိယအကြိမ်မှာ MI 35 ကပတ်ပြီးပစ်ကူပေးတဲ့အချိန်မှာ MI 17 က စစ်ကူနဲ့ ထောက်ပို့တွေချပြီး ဒဏ်ရာရတဲ့သူတွေကို သယ်သွား တယ်” ဟု NLA တပ်ဖွဲ့ တာဝန်ရှိသူက မဇ္စျိမ ကိုပြောသည်။
ဩဂုတ်လ ၁၈ ရက်နေ့ မွန်းလွဲ ၂ နာရီ ၃၀ မိနစ်ကလည်း Y.C.D.C ဝင်းအတွင်း တပ်စွဲထားသည့် စစ်ကောင်စီတပ်ဖွဲ့ကို NLA နှင့် မဟာမိတ်များဖြစ်သော ချင်းအမျိုးသားကာကွယ်ရေးတပ်ဖွဲ့ (CNDF)၊ ထာလ်ဒိုပြည်သူ့ကာကွယ်ရေးတပ်ဖွဲ့(TDA)တို့ ပူးပေါင်းတိုက်ခိုက်ခဲ့ရာ စစ်ကောင်စီတပ်ဖွဲ့ဘက်မှ သေဆုံး ဒဏ်ရာရရှိသူများရှိကြောင်း သိရသည်။
စာတည်း။ ။ ဖူးသိမ်ကျ
စာမူတည်းဖြတ်။ ။စောဖေ
ရုပ်သံအညွှန်း - လေကြောင်းမှ တပ်အင်အားတိုးချဲချထားခြင်းပြုလုပ်နေသည့် စစ်ကောင်စီတပ်ဖွဲ့လေယာဉ်။