ကိုဗစ်ရောဂါကြောင့် သုံးနှစ်နီးပါးပိတ်ထားသည့် ထိုင်း-မြန်မာနယ်စပ်ဂိတ်တစ်ခု ဖြစ်သော တာချီလိတ်−မယ်ဆိုင် ချစ်ကြည်ရေးတံတား အမှတ်(၁)ကို ယနေ့ ဖေဖော်ဝါရီလ ၂၀ ရက်နေ့ နံနက် ၇ နာရီ အချိန်တွင် ပြန်လည်ဖွင့်လှစ်လိုက်ပြီဖြစ်ကြောင်း ဒေသခံများထံမှ သိရသည်။
အဆိုပါ တာချီလိတ်−မယ်ဆိုင်တံတားသည် ရှမ်းပြည်နယ်အရှေ့ပိုင်း တာချီလိတ်မြို့နှင့် ထိုင်းနိုင်ငံ မယ်ဆိုင်မြို့အကြား ဆက်သွယ်ထားသည့် နယ်စပ်ဂိတ်တစ်ခု ဖြစ်သည်။
ရှမ်းပြည်နယ်အရှေ့ပိုင်း တာချီလိတ်အခြေစိုက် ခရီးသွားဝန်ဆောင်မှုလုပ်ငန်း လုပ်ကိုင်နေသူ တစ်ဦးက “ဟုတ်ပါတယ်၊ ဂိတ်ကတော့ ဒီမနက်ကပဲ ပြန်လည်ဖွင့်လှစ်လိုက်တာပါ။ အဝင်/ထွက်ကတော့ ဘာမှ မသိရသေးဘူး နှစ်ဖက် ဒေသအာဏာပိုင်တွေအလုပ်ရှုပ်နေကြလို့ ဒေသခံတွေအနေနဲ့ သွားသွားလာလာ မလုပ်သေးတာ ဖြစ်နေတယ်”ဟု ပြောသည်။
တာချီလိတ်−မယ်ဆိုင်တံတား ပြန်လည်ဖွင့်လှစ်ချိန်တွင် တံတားစစ်ဆေးရေးဂိတ် ဖြတ်သန်းသွားလာသူ များကို စစ်ကောင်စီဖက်က X−ray စက်သုံးပြီး စစ်ဆေးရန်စီစဉ်နေကြောင်း ဒေသခံ ခရီးသွားအေဂျင်စီ များထံမှ သိရသည်။
စာတည်း။ ။စောဖေ
စာမူတည်းဖြတ်။ ။စောဖေ