တံစိုးလက်ဆောင်များလက်ခံရယူခဲ့သည့် ဒုတိယဗိုလ်ချုပ်ကြီး စိုးထွဋ်ကို စစ်တရားရုံးဖြင့် စီရင်ပြီး ထောင်ဒဏ် ငါးနှစ် ချမှတ်လိုက်ကြောင်း စစ်ကောင်စီဝါဒဖြန့် မြဝတီရုပ်သံက ယနေ့ နိုဝင်ဘာ ၁၀ ရက်နေ့ ညပိုင်းတွင်ကြေညာသည်။
ဒုတိယဗိုလ်ချုပ်ကြီးဟောင်း စိုးထွဋ်အနေဖြင့် ပြည်ထဲရေးဝန်ကြီးဌာန ပြည်ထောင်စုဝန်ကြီးအဖြစ်တာဝန်ယူခဲ့စဥ်ကရာထူးနှင့်လုပ်ပိုင်ခွင့်ကို မလျော်သြဇာ အသုံးပြုပြီး ဆောင်ရွက်ခဲ့ခြင်း၊ တံစိုးလက်ဆောင် လက်ခံရယူခဲ့ခြင်းတို့ ပြုလုပ်ခဲ့ကြောင်း စစ်ကောင်စီ၏ ထုတ်ပြန်ချက်တွင် ဖော်ပြသည်။
၎င်းသည် ပြည်ထဲရေးဝန်ကြီးဌာန ပြည်ထောင်စုဝန်ကြီးအဖြစ်တာဝန်ယူခဲ့စဥ်က Green Channel စနစ်ဖြင့် နိုင်ငံကူးလက်မှတ်ဝန်ဆောင်မှု လုပ်ငန်းလုပ်ကိုင်ရန်အတွက် ကုမ္ပဏီများ၏ အကူအညီတောင်းခံခဲ့မှုအပေါ် ရာထူးနှင့်လုပ်ပိုင်ခွင့်ကို မလျော်သြဇာ အသုံးပြုပြီးနိုင်ငံကူးလက်မှတ်များခွင့်ပြုပေးရန်ညွှန်ကြားခဲ့ကြောင်း ဆိုထားသည်။
ထို့ပြင် ပြည်ထဲရေးဝန်ကြီးဌာန၏ ဝန်ထမ်းသက်သာချောင်ချိရေးရန်ပုံငွေဆိုင်ရာ ဘဏ္ဍာရေး လုပ်ထုံးလုပ်နည်းနှင့် ညီညွတ်မှုမရှိသည့်ဆောင်ရွက်မှုများအပေါ်ထိန်းသိမ်းကြပ်မတ်ကွပ်ကဲရန် ပျက်ကွက်ခဲ့ကြောင်းလည်း ဖော်ပြထားသည်။
အဆိုပါ အမှုတွင်ပါဝင်ပတ်သက်ခဲ့သူများကိုလည်း နယ်ဘက်တရားရုံးတွင်လည်းကောင်း၊ စစ်ကောင်စီလက်အောက်ခံ ရဲတပ်ဖွဲ့မှ တာဝန်ရှိသူများကို ရဲစည်းကမ်းဖြင့်လည်းကောင်း ဆက်လက်အရေးယူဆောင်ရွက်လျက်ရှိကြောင်းလည်း ထုတ်ပြန်ထားသည်။
သို့သော် ဆက်လက်အရေးယူဆောင်ရွက်မည့် ရဲတပ်ဖွဲ့တာဝန်ရှိသူများနှင့် ပါဝင်ပတ်သက်ခဲ့သူများ၏ နာမည်ကို ထုတ်ပြန်ခြင်းမရှိပေ။
ဒုတိယဗိုလ်ချုပ်ကြီး စိုးထွဋ်သည် ယခင်က စစ်ကောင်စီအဖွဲ့ဝင်တဦးဖြစ်သည့်အပြင် ပြည်ထောင်စုအစိုးရအဖွဲ့ရုံးဝန်ကြီးဌာန ၁ ပြည်ထောင်စုဝန်ကြီးအဖြစ်လည်း တာဝန်ထမ်းဆောင်ခဲ့သူဖြစ်သည်။
ထို့နောက် စက်တင်ဘာလအတွင်းတွင် အဆိုပါရာထူးနေရာများမှ ဖယ်ရှားခံလိုက်ရခြင်းဖြစ်သည်။
ပြီးခဲ့သည့်အောက်တိုဘာလ ၁၀ ရက်နေ့ကလည်း ဒုတိယဗိုလ်ချုပ်ကြီးဟောင်း မိုးမြင့်ထွန်းနှင့် ဗိုလ်မှူးချုပ်ဟောင်း ရန်နောင်စိုးတို့ကို လာဘ်စားမှုများကြောင့် စစ်တရားရုံးဖြင့် စစ်ဆေးပြီး နှစ်ဆယ်နှစ် ကာလနှင့် ညီမျှသော တသက်တကျွန်းဒဏ်ကို အသီးသီးချမှတ်လိုက်ကြောင်း စစ်ကောင်စီက ထုတ်ပြန်ခဲ့သည်။