ဆယ်စုနှစ်များအတွင်း မြန်မာနိုင်ငံတွင် ပထမဆုံးဖြစ်မည့် အရပ်သားအစိုးရတွင် ဒုတိယသမ္မတအဖြစ် အမေရိကန်နိုင်ငံက ဘလက်လစ်စာရင်းသွင်းထားသူ အငြိမ်းစား ဒုတိယဗိုလ်ချုပ်ကြီး ဦးမြင့်ဆွေအား တပ်မတော်က ရွေးချယ်၍ ဝေဖန်မှုများ ထွက်ပေါ်နေသည်။
အသက် ၆၄ နှစ်ရှိပြီဖြစ်သည့် ဦးမြင့်ဆွေသည့် အရှေ့တောင်အာရှ မြန်မာနိုင်ငံအား ဆယ်စုနှစ်များစွာ အထီးကျန်စေကာ ဆင်းရဲမှုသို့ တွန်းပို့ခဲ့သည့် စစ်အုပ်ချုပ်ရေးအသိုင်းအဝန်းမှဖြစ်ပြီး ယခင်စစ်ခေါင်းဆောင် ဗိုလ်ချုပ်မှူးကြီး သန်းရွှေနှင့် နီးစပ်သူလည်း ဖြစ်ဖွယ်ရှိသည်။
ဦးမြင့်ဆွေအား သမ္မတလောင်းအဖြစ် စစ်တပ်က အမည်စာရင်းတင်သွင်းခဲ့ပြီးနောက် လူမှုမီဒီယာတွင် ဝေဖန်မှုများ ထွက်ပေါ်လာခဲ့ခြင်းဖြစ်သည်။
လက်ရှိရ န်ကုန်တိုင်းဝန်ကြီးချုပ်ဖြစ်သူ ဦးမြင့်ဆွေအား ဒဏ်ခတ်ပိတ်ဆို့ထားဆဲဖြစ်ကြောင်း အမေရိကန်နိုင်ငံခြားရေးဝန်ကြီးဌာနက အတည်ပြုသော်လည်း သံတမန်ဆက်ဆံရေးအပေါ် သက်ရောက်မှု ရှိလာမလားဆိုသည်ကို ပြန်လည်ဖြေကြားခြင်း မရှိပေ။
"ဒီအတွက်တော့ ကျွန်တော်တို့ဖက်က ရှေ့ဆက်ပြီး သတိထား စောင့်ကြည့်သွားရမှာပဲဖြစ်ပါတယ်။"ဟု ဝါရှင်တန်တွင် မတ် ၁၁ ရက်က ပြုလုပ်သည့် သတင်းစာရှင်းလင်းပွဲ၌ နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဂျွန်ကိုင်ဘီက ပြောခဲ့သည်။
၂၀၁၁ ခုနှစ်တွင် စစ်အုပ်ချုပ်ရေးမှ အရပ်သားတစ်ပိုင်းအစိုးရဖြင့် မြန်မာနိုင်ငံအသွင်ကူးပြောင်းလာချိန်တွင် အမေရိကန်က စီးပွားရေးပိတ်ဆို့မှုများကို ဖြေလျှော့ပေးခဲ့သည်။
သို့သော် ဦးမြင့်ဆွေအပါအဝင် စီးပွားရေးလုပ်ငန်းရှင်ကြီးများနှင့် စစ်တပ်အရာရှိကြီးများ များစွာကို ဘလက်လစ်စာရင်းသွင်းထားဆဲဖြစ်ကာ ၎င်းတို့နှင့် စီးပွားရေးလုပ်ဆောင်ခြင်းများကို တားမြစ်ထားဆဲဖြစ်သည်။
