ဇူလိုင် ၂၂
Stay at Home သတ်မှတ်ထားတဲ့ ပုသိမ်မြို့မှာ ကိုဗစ်တတိယလှိုင်းအတွင်း လူသေဆုံးမှုတွေ မြင့်တင်လာခဲ့ပြီး ပုသိမ်မြို့ပေါ်နေပြည်သူတွေ မလိုအပ်ပဲ အပြင်မထွက်စေဘဲ ကိုဗစ်-၁၉ ရောဂါပိုးကူးစက် ခံရမှာကို စိုးရိမ်တာကြောင့် လူငယ်တွေစုစည်းပြီး ဝယ်ပေးမယ် (ပုသိမ်)အဖွဲ့ကို ဇူလိုင်လ ၁၅ ရက်နေ့က စတင်ဖွဲ့စည်းခဲ့ပါတယ်။
အပြင်မထွက်ပဲ စျေးဝယ်ချင်တဲ့ ပြည်သူတွေက ဝယ်ပေးမယ် (ပုသိမ်)အဖွဲ့ရဲ့ အွန်လိုင်းစာမျက်နှာမှာကြေညာထားတဲ့ ဖုန်းနံပါတ်နဲ့ Messenger တွေကတဆင့် စျေးဝယ်ဖို့အကူအညီတောင်းနိုင်တယ်လို့သိရပြီး ဝယ်ယူလိုတဲ့ ပစ္စည်းတွေ လက်ထဲရောက်မှသာ ငွေပေးချေရမှာဖြစ်တယ်လို့ အဖွဲ့ဝင်တစ်ဦးကပြောပါတယ်။
"ပထမစဖွဲ့တော့ကျွန်တော်တို့မှာ အဖွဲ့ဝင် ၁၅ ယောက်နဲ့ပိုက်ဆံ ၄ သောင်းပဲရှိတော့ နဲနဲတော့ခက်ခဲတယ်၊ ခုနောက်ပိုင်းတော့အဆင်ပြေပါတယ်၊ပစ္စည်းတွေက တစ်ဆိုင်နဲ့တစ်ဆိုင်စျေးမတူတော့ အဲ့ဒီအခက်အခဲလဲရှိတယ်၊ ဒါပေမဲ့ ဝယ်ခိုင်းတဲ့သူတွေအကုန်လုံးက ကျေးဇူးတင်ကြောင်းပြောကြပါတယ်၊ အောက်ဆီဂျင်အိုး တန်းစီပေးတာမျိုးတွေလဲ လုပ်ပေးပါတယ်၊ အကုန်လုံးကို အခမဲ့ကူညီနေတာပါ"လို့ အဖွဲ့ဝင်တစ်ဦးက မဇ္စျိမကို ပြောပါတယ်။
လက်ရှိမှာတော့ ဝယ်ပေးမယ် (ပုသိမ်)အဖွဲ့ကို ပုသိမ်မြို့ပေါ်ပြည်သူတွေက အလှူငွေတွေ၊ကြက်ဥတွေ နဲ့ဆန်တွေလှူလာတာမျိုးတွေရှိလာတယ်လို့သိရပြီး ရရှိလာတဲ့ အလှူငွေနဲ့ ပစ္စည်းတွေကို ငွေကြေးအဆင်မပြေတဲ့ နေထိုင်စားသောက်ဖို့ ခက်ခဲနေသူတွေကို ပြန်လည် လှူဒါန်းပေးနေတယ်လို့လည်းသိရပါတယ်။
