ဩဂုတ် ၂၂

သမ္မတဒေါ်နယ်ထရမ့်က  တရုတ်အက်ပလီကေးရှင်း တစ်ခုဖြစ်သည့် WeChat အပေါ်  တားမြစ်မိန့်ထုတ်ပြန်လိုက်ခြင်းသည် ဥပဒေဆိုင်ရာအခွင့်ရေးများကို ချိုးဖောက်သည်ဟုဆိုကာ အမေရိကန်ရှိ WeChat သုံးစွဲသူများက ပြစ်တင်ဝေဖန်လိုက်ပြီး တရားစွဲလိုက်ကြောင်းသိရသည်။

ဩဂုတ်လ အစောပိုင်းက Tencent Holdings ပိုင်ဆိုင်သော WeChat နှင့် ByteDance ၏ TikTok အက်ပလီကေးရှင်းများ၏ အမေရိကန်အတွင်းဝန်ဆောင်မှုများကို စက်တင်ဘာ ၂၀ မတိုင်မီ တားမြစ်မည်ဖြစ်ကြောင်း သမ္မတဒေါ်နယ်ထရမ့်က အထူးအမိန့်နှစ်ရပ်ကို လက်မှတ်ရေးထိုးခဲ့သည်။   

ထိုတားမြစ်ချက်ကြောင့် ၎င်းအက်ပလီကေးရှင်းများကို များစွာမှီခိုအားထားနေရသော အမေရိကန်ရှိ တရုတ်-အမေရိကန်လူမျိုးများနှင့် တရုတ်စီးပွားရေးသမားများအတွက် စိုးရိမ်စရာဖြစ်ခဲ့သည်။  

သမ္မတအမိန့်ထုတ်ပြန်ပြီး ရက်အနည်းငယ်အကြာ၌ တရုတ်-အမေရိကန်ရှေ့နေငါးဦးတည်ထောင်ထားသော အမေရိကန် WeChat သုံးစွဲသူများမဟာမိတ် (U.S. WeChat Users Alliance) အဖွဲ့က ကယ်လီဖိုးနီးယား မြောက်ပိုင်း ခရိုင်တရားရုံး၌ သောကြာ ညနေက တားမြစ်မိန့်ကို ရုပ်သိမ်းပေးရန် အမှုဖွင့်ခဲ့သည်။ တရားခံများစာရင်းတွင် ထရမ့်နှင့် ကူးသန်းရောင်းဝယ်ရေးဝန်ကြီး Wilbur Ross တို့ကိုပါ ထည့်သွင်းထားသည်။

အဆိုပါတရားစွဲဆိုမှုအတွက် ဆန်ဖရန်စ္စကိုအခြေစိုက် ဥပဒေကုမ္ပဏီ Rosen Bien Galvan & Grunfeld ကို ပူးတွဲတည်ထောင်သူ Michael Bien ကို ရှေ့နေအဖြစ် ငှားရမ်းထားသည်။  

“လူမှုမီဒီယာအက်ပလီကေးရှင်းတွေနဲ့ လုပ်ဆောင်ချက်တွေက ကျွန်တော်တို့ရဲ့ လူ့အဖွဲ့အစည်းမှာ အများပြည်သူဆိုင်ရာ နေရာတစ်ခုနဲ့တူတယ်ဆိုတာ တရားရုံးချုပ်က အသိအမှတ်ပြုပါတယ်။ ပြောဆိုဆွေးနွေးနိုင်တဲ့ ရင်ပြင် တစ်ခုနဲ့တူပြီး စိတ်ကူးအကြံအစည်တွေနဲ့ သတင်းအချက်အလက်တွေကို သင်ယူဝေမျှနိုင်တဲ့နေရာတစ်ခုပါ။ ဒါကြောင့် WeChat ကို အသုံးပြုကြတာပါ” ဟု Bien က ဆိုသည်။  

ယနေ့အချိန်ထိ အမေရိကန် WeChat သုံးစွဲသူများမဟာမိတ်က နိုင်ငံတစ်ဝန်းမှ အလှူငွေ အမေရိကန်ဒေါ်လာ ၅၀ ၀၀၀ နီးပါးကို ရရှိထားသည်။ တရားစွဲဆိုမှုသည် WeChat သို့မဟုတ် ၎င်း၏မိခင်ကုမ္ပဏီ Tencent နှင့် မသက်ဆိုင်ကြောင်း၊ အခွင့်အရေးအတွက် တိုက်ပွဲဝင်နေသော အမေရိကန်ရှိ WeChat သုံးစွဲသူများဖြစ်ကြောင်း တရားစွဲဆိုသည့်အဖွဲ့ဝင်ဖြစ်သူ Clay Zhu က ပြောသည်။  

WeChat ကိုတားမြစ်မှုနှင့်စပ်လျဉ်း၍ မိခင်ကုမ္ပဏီ Tencent အနေဖြင့် ကိုယ်တိုင်တရားစွဲဆိုမှုပြုမည်လားဆိုသည်ကို မသိရပေ။