ဒီဇင်ဘာ ၁၀ ။ ။ Twitter ကုမ္ပဏီရဲ့ အမှုဆောင်အရာရှိချုပ်ဖြစ်သူ Jack Dorsey ကတော့ မြန်မာနိုင်ငံကို လူအများ သွားရောက်လည်ပတ်သင့်တဲ့ ခရီးသွားနေရာတစ်ခုအနေနဲ့ သူ့ရဲ့ လူမှုကွန်ရက်ကနေတဆင့် ပုံရိပ်မြှင့်တင်ပေးခဲ့ပါတယ်။
Jack Dorsey က ၎င်းဟာ ပြီးခဲ့တဲ့ လတုန်းက မြန်မာနိုင်ငံ မြောက်ပိုင်းဘက်ကို တရားစခန်း ဝင်ဖို့ သွားရောက်ခဲ့တဲ့ အတွေ့အကြုံတွေနဲ့ပတ်သက်လို့ တွစ်တာကနေတဆင့် ထုတ်ဖော်ရေးသားထားခဲ့ပါတယ်။
" အဲဒီက လူတွေက တကယ့်ကို ပျော်ရွှင်နေကြပါတယ်၊ အဲဒီက အစားအသောက်တွေကလည်း မယုံနိုင်လောက်အောင် ကောင်းလွန်းပါတယ်" ဆိုပြီး ၎င်းက ရေးသားထားပါတယ်။
အဲဒီအတွက်ကြောင့်လည်း ၎င်းရဲ့ follower တွေကိုလည်း မြန်မာနိုင်ငံဆီ သွားလည်ကြဖို့ကိုပါ Dorsey က တိုက်တွန်းထားခဲ့ပါတယ်။
" ကျွန်တော် ရန်ကုန်၊ မန္တလေး၊ ပုဂံ တို့ကို သွားလည်ခဲ့တယ်၊ နိုင်ငံတစ်ဝှမ်းက ဘုန်းတော်ကြီးကျောင်းတွေကိုလည်း သွားခဲ့ပါတယ်" ဆိုပြီး Dorsey က တွစ်တာမှာ ရေးထားခဲ့ပါတယ်။
ဒါ့အပြင် ၎င်းမြန်မာနိုင်ငံဆီ လာလည်ချိန်တုန်းက ၁၀ ရက်ကြာ ၀ိပဿနာ တရားစခန်း ဝင်ချိန် အနက်ရောင်ဝတ်စုံနဲ့ ရိုက်ကူးထားတဲ့ ပုံတစ်ပုံကိုလည်း Dorsey က တွစ်တာပေါ် တင်ခဲ့သေးတယ်လို့ သိရပါတယ်။
ဒါပေမယ့်လည်း ယင်းကဲ့သို့ Twitter စီအီးအိုရဲ့ မြန်မာနိုင်ငံအကြောင်း အမွှမ်းတင်မှုနဲ့ပတ်သက်လို့ ဆိုရှယ်မီဒီယာပေါ်မှာ ဝေဖန်မှုတွေလည်း ထွက်ပေါ်ခဲ့ပါတယ်။
မြန်မာနိုင်ငံမှာ ဘင်္ဂါလီ မွတ်ဆလင် အကျပ်အတည်းကိစ္စ လူ့အခွင့်အရေးချိုးဖောက်မှုတွေ ရှိတယ်ဆိုတဲ့ စွပ်စွဲချက်တွေ ထွက်ပေါ်ထားခဲ့တဲ့ အခြေအနေတွေ ရှိနေချိန် ခုလိုမျိုး Jack Dorsey ရဲ့ ပုံရိပ်မြှင့်တင်မှုအပေါ် တစ်ချို့က ဝေဖန်ပြစ်တင်ခဲ့ကြတယ်လို့ သိရပါတယ်။
