ပြင်ဦးလွင်-နောင်ချိုလမ်းပိုင်း၌ လုံခြုံရေးစိတ်မချရသေးသဖြင့် အရေးကြီးကိစ္စမရှိလျှင် မလာကြ ရန် နောင်ချိုဒေသခံများက သတိပေးကြသည်။
“မနေ့ကတရက်လေးပဲ ခဏငြိမ်တယ်။ ဒီနေ့မနက်ကတည်းက ပစ်ခတ်သံတွေ ပြန်ကြားရတယ်။ ဘယ် လောက်လုံခြုံစိတ်ချရပါတယ်လို့ပြောပြော မယုံကြပါနဲ့။ နောင်ချိုမှာ လုံခြုံရေးစိတ်မချရသေးဘူး၊ လမ်း ကတော့ ပွင့်သွားပြီ၊ သွားလို့လာလို့ မကောင်းသေးဘူး” ဟု ဒေသခံအမျိုးသမီးတစ်ဦးကပြောသည်။
ပြင်ဦးလွင်-နောင်ချိုလမ်းပိုင်းအတွင်း ပြင်းထန်သည့်တိုက်ပွဲများ ယာယီရပ်တန့်နေသော်လည်း ထိတွေ့ တိုက်ပွဲငယ်များ ဖြစ်နေသေးကြောင်း ဒေသခံသတင်းရင်းမြစ်များကပြောကြားသည်။
စစ်ကောင်စီကမူ မန္တလေး-ပြင်ဦးလွင်-နောင်ချိုလမ်းပိုင်းအား လုံခြုံစိတ်ချစွာ အသုံးပြုနိုင်ပြီဖြစ်ကြောင်း ကြေညာထားသည်။
“အခုရာသီက နောင်ချိုမှာ တိမ်ပင်လယ်ရာသီဆိုတော့ ခရီးသွားတွေကလည်း တအားလာချင်နေကြ တယ်။ ရှင်းရှင်းပဲပြောမယ် မလာကြပါနဲ့ဦး၊ နောင်ချိုဟာ အချိန်မရွေးထပေါက်နိုင်တဲ့ ချိန်ကိုက်ဗုံးတလုံး ပေါ် ခွထိုင်ထားရတဲ့ အနေအထားပါ။ မြို့ကလူတွေတောင် မဖြစ်မနေမှ အပြင်ထွက်ပါတယ်” ဟု သတင်း ရင်းမြစ်တဦးကလည်းပြောသည်။
ရှမ်းပြည်မြောက်ပိုင်း၊ နောင်ချိုမြို့နယ်၊ ကျောက်ကြမ်းကျေးရွာ၌တပ်စွဲထားသော စစ်ကောင်စီစခန်းကို တအာင်းတပ်မတော် PSLF/TNLA နှင့် MDY PDF ပူးပေါင်းအဖွဲ့က ပြီးခဲ့သည့် အောက်တိုဘာလ ၂၉ ရက် နေ့တွင် စခန်းသိမ်းတိုက်ပွဲ ဆင်နွှဲခဲ့သည်။
ထို့နေ့မှစပြီး ပြင်ဦးလွင်-နောင်ချိုလမ်းပိုင်း(ဘန့်ဘွေး-အုမ္မတီး-ရွှေညောင်ပင်-အုမ္မခါး-ကျောက်ကြမ်း)တွင်၊ နှစ်ဘက်တပ်ဖွဲ့များကြား ပြင်းထန်တိုက်ပွဲ သုံးကြိမ်ထက်မနည်းဖြစ်ပွားခဲ့ပြီး ယနေ့အထိလည်း ပစ်ခတ်သံ များ ကြားနေရဆဲဖြစ်ကြောင်း ဒေသခံများကဆိုသည်။
“သီပေါ-ကျောက်မဲလမ်းပိုင်းလည်း ပိတ်လိုက်ပြီ၊ ဂုတ်တွင်းဝန်းကျင်မှာလည်း တော်လှန်ရေးတပ်တွေစိုးမိုး ထားတယ်။ ကျောက်မဲနဲ့သီပေါလည်း သွားမရတော့ဘူး” ဟု ကျောက်မဲမြို့မှ ဒေသခံတစ်ဦးက ပြောသည်။
ရှမ်းပြည်မြောက်ပိုင်းတွင် အောက်တိုဘာလ ၂၇ ရက်နေ့ကစတင်ခဲ့သည့် မြောက်ပိုင်းညီနောင် မဟာမိတ် သုံးဖွဲ့၏ ၁၀၂၇ စစ်ဆင်ရေးကြောင့် စစ်ကောင်စီတပ် အထိနာနေသလို အဆိုပါစစ်ဆင်ရေးကြောင့်လည်း နိုင်ငံအနှံ့အပြားတွင် တော်လှန်ရေးရေချိန် ပြန်လည်မြင့်တက်နေသည်။
စာတည်း။ ။စောဖေ
