ချင်းပြည်နယ်၊ မင်းတပ်မြို့နယ်တွင် စစ်ကောင်စီတပ်က ယနေ့ နိုဝင်ဘာလ ၅ ရက် နံနက် ၁၀ နာရီ ၂၀ မိနစ်အချိန်က လေယာဥ်ဖြင့်ဗုံးကြဲပြီး လက်နက်ကြီးများဖြင့် ပစ်ခတ်ခဲ့ကြောင်း ချင်းကာ ကွယ်ရေးတပ်ဖွဲ့ (မင်းတပ်)က ထုတ်ပြန်သည်။
တိုက်ပွဲဖြစ်ပွားခြင်းမရှိဘဲ မင်းတပ်မြို့နယ် (၁၆)မိုင်နှင့် ပန်းစခန်းအကြားရှိ အများပြည်သူသွားလာသည့် လမ်းကို လေကြောင်းမှနှစ်ကြိမ်လာရောက်၍ ဗုံးခြောက်လုံးကြဲချခဲ့ရာ လမ်းဘေးရှိ လူနေအိမ်သုံးလုံး ပျက် စီးခဲ့ကြောင်း သိရသည်။
“အဲဒီနေရာက ရွာဖက်သွားတဲ့လမ်း၊ လူစုလူဝေးအမြဲဖြစ်တဲ့လမ်းဆိုတော့ အဲဒီနားမှာ လူတွေရှိမယ်ထင် ပြီးကြဲတာနေမယ်” ဟု CDF – Mindat သတင်းပြန်ကြားရေးနှင့် မှတ်တမ်းတင်ဌာနမှူး ဇလပ်သွေးက မဇ္စျိမကို ပြောသည်။
လမ်းဆုံဖြစ်သော အဆိုပါနေရာတွင် ယခင်က ဈေးဆိုင်များဖွင့်ပြီး နေထိုင်ခဲ့ကြသော်လည်း ယခုနှစ်တွင် ခရီးသွားကြဲပါးသဖြင့် လူနေထိုင်ခြင်း မရှိကြောင်း ဆိုသည်။
စစ်ကောင်စီတပ်သည် လေကြောင်းမှ တိုက်ခိုက်မှုအပြင် မင်းတပ်မြို့အခြေစိုက် ခလရ (၂၇၄) မှလည်း လက်နက်ကြီးဖြင့် ပစ်ခတ်မှု ငါးကြိမ်ပြုလုပ်ခဲ့ကြောင်း ထုတ်ပြန်ချက်တွင် ဖော်ပြထားသည်။
အောက်တိုဘာလအတွင်း စစ်ကောင်စီတပ်သည် မင်းတပ်မြို့နယ်အတွင်းသို့ တိုက်ပွဲဖြစ်ပွားခြင်းမရှိဘဲ လက်နက်ကြီးဖြင့် ပစ်ခတ်မှု ၂၃ ကြိမ်ပြုလုပ်ခဲ့ရာ လူနေအိမ်ခြောက်လုံး၊ ဆိုင်ကယ်နှစ်စီး ပျက်စီးခဲ့ပြီး အိမ်မွေးတိရစ္ဆာန်ငါးကောင် သေဆုံးခဲ့ကြောင်း၊ ဒေသခံ အမျိုးသားနှစ်ဦးနှင့် အမျိုးသမီးတဦးကို ဖမ်းဆီးခဲ့ ရာ အမျိုးသမီးမှာ ပြန်လည်လွတ်မြောက်လာသော်လည်း အမျိုးသားတဦး ဆက်လက်ချုပ်နှောင်ခံနေရပြီး အခြားတဦးသေဆုံးခဲ့ကြောင်း CDF – Mindat က နိုဝင်ဘာလ ၂ ရက်နေ့တွင် ထုတ်ပြန်ထားသည်။
စာတည်း ။ ။ ဖူးသိမ်ကျ
စာမူတည်းဖြတ်။ ။စောဖေ
