ကရင်နီပြည်နယ်၊ ဖရူဆိုမြို့ ၊ အမှတ်(၁၄) တန်းမြင့်စစ်လေ့ကျင့်ရေးကျောင်းတွင် ရပ်နားထားသည့် စစ်ကောင်စီယာဥ်တန်းမှ လက်နက်ကြီးဖြင့် ရမ်းသန်းပစ်၍ အမျိုးသမီးတဦး ဦးခေါင်းနှင့် ကျောကုန်းတွင် ထိခိုက်ဒဏ်ရာရရှိကာ နေအိမ်ပျက်စီးမှုများ ရှိကြောင်း ကရင်နီအမျိုးသားများကာကွယ်ရေးတပ်ဖွဲ့ (KNDF) က အောက်တိုဘာလ ၆ ရက်နေ့တွင် ထုတ်ပြန်သည်။
မယ်စဲ့မြို့သို့ ဦးတည်နေသည့် ယာဥ်အစီး ၆၀ ခန့် ပါ ထိုစစ်ကောင်စီ ရိက္ခာယာဉ်တန်း မှ အောက်တိုဘာ ၅ ရက်နေ့ ညနေ ၅ နာရီခန့်တွင် လက်နက်ကြီးဖြင့် ပစ်ခတ်ခဲ့ရာ ဖရူဆိုမြို့နယ်၊ အနောက်ဖက်ခြမ်းရှိ ကျေးရွာတရွာမှ အသက် ၅၀ အရွယ် အမျိုးသမီး တဦး ထိခိုက်ပြီး နွားတကောင် သေဆုံးခဲ့ကြောင်း သိရသည်။ ထို့ပြင် ကျေးရွာဘက်သို့ ထိုနေ့ ည ၁၀ နာရီကျော်အချိန်တွင်လည်း ယင်းလေ့ကျင့်ရေးကျောင်းမှ လက်နက်ကြီး ၁၀ လုံးခန့် ထပ်မံပစ်ခတ်ခဲ့ကြောင်း ဆိုသည်။
“စစ်ယာဉ်တန်း အားလုံးနီးပါးက တန်းမြင့်လေးကျင့်ရေးကျောင်းမှာ ရှိနေတယ်ဗျ။ ဖရူဆိုနဲ့ထားလဲရွာကြားမှာရှိတယ်ဗျ။ လက်နက်ကြီးပစ်ခတ်တာ လေယာဉ်ဗုံးကြဲတာရှိတယ်ဗျ။ ထိခိုက်မှုတော့ အသေးစိတ်မသိရဘူးဗျ။ မြေပြင်က ဖုန်းလိုင်းအဆင်မပြေလို့ပါဗျ” ဟု ဒီးမော့ဆို ပြည်သူ့ကာကွယ်ရေးတပ်မှ ပြန်ကြားရေးတာဝန်ရှိသူတဦးက ယနေ့ အောက်တိုဘာလ ၇ ရက် နေ့ခင်းပိုင်း၌ မဇ္ဈိမကို ပြောသည်။
အောက်တိုဘာလ ၄ ရက်နေ့ ည ၁၁နာရီခန့်တွင်လည်း တာဝေးပစ် ၁၂၀ မမ လက်နက်ကြီး ပစ်ခတ်မှုကြောင့် ကျေးရွာအတွင်း လက်နက်ကြီး ငါးလုံးကျရောက်ပေါက်ကွဲကာ နေအိမ်နှစ်လုံး ထိခိုက်ပျက်ဆီးခဲ့ကြောင်း သိရသည်။
ယင်းကျေးရွာတွင် ပြည်သူများနေထိုင်နေသေးသည့်အပြင် တိုက်ပွဲဖြစ်ပွားခြင်းလည်းမရှိဘဲ စစ်ကောင်စီက လက်နက်ကြီးများဖြင့် အကြောင်းမဲ့ ပစ်ခတ်တိုက်ခိုက်နေခြင်းသည် ပြည်သူများအား ရန်သူသဖွယ် သတ်မှတ်ကာ စစ်ရာဇဝတ်မှုများကို စစ်ကောင်စီက ပေါ်ပေါ်ထင်ထင် ကျူးလွန်နေခြင်းဖြစ်ကြောင်း ထုတ်ပြန်ချက်တွင် ဖော်ပြထားသည်။
ထိုယာဥ်တန်းသည် ပြီးခဲ့သည့် ဩဂုတ်လအစပိုင်းတွင် လွိုင်ကော်မြို့မှ ထွက်ခွာလာကာ မယ်စဲ့မြို့နယ် ပန်းတိန်ဒေသသို့ ဦးတည်ချီတက်နေသည့် ယာဉ်တန်းဖြစ်သော်လည်း ယနေ့ အောက်တိုဘာလ ၇ ရက်နေ့အထိ ရှေ့ဆက်မတိုးနိုင်သေးကြောင်း သိရသည်။
လက်ရှိတွင် စစ်ကောင်စီယာဉ်တန်းရောက်ရှိနေသည့် ဖရူဆိုမြို့၌ တိုက်ပွဲဆက်လက်ဖြစ်ပွားနေပြီး တိုက်ပွဲဖြစ်ပွားခြင်းမရှိသည့် လွိုင်ကော်နှင့် ဖယ်ခုံမြို့ရှိ စစ်ရေးပစ်မှတ်မဟုတ်သည့် စစ်ရှောင်စခန်းများကိုလည်း လေကြောင်းဖြင့် ဗုံးကြဲတိုက်ခိုက်ခဲ့ကြောင်း KNDF က ထုတ်ပြန်ထားသည်။
စစ်ကောင်စီသည် ပြီးခဲ့သည့် စက်တင်ဘာလအတွင်း ကရင်နီပြည်အတွင်း လေကြောင်းတိုက်ခိုက်မှု ၂၀ ကြိမ်ပြုလုပ်ခဲ့၍ ပြည်သူ ခုနစ်ဦး ဒဏ်ရာရကာ စစ်ကောင်စီ၏ လက်နက်ကြီးထိမှန်မှုကြောင့် ပြည်သူတဦးနှင့် မြေမြှုပ်မိုင်းကြောင့် ပြည်သူတဦး သေဆုံးခဲ့ရကြောင်း KNDF က အောက်တိုဘာလ ၃ ရက်နေ့တွင် ထုတ်ပြန်ထားသည်။
စက်တင်ဘာလအတွင်းတွင် စစ်ကောင်စီ၏ လေကြောင်းတိုက်ခိုက်မှုနှင့် လက်နက်ကြီးပစ်ခတ်မှုကြောင့် ကရင်နီပြည်အတွင်းရှိ ခရစ်ယာန်ဘာရားကျောင်းတကျောင်း၊ ကျန်းမာရေးအဆောက်အအုံ တလုံးနှင့် နေအိမ် သုံးလုံး ပျက်ဆီးခဲ့ရကြောင်း KNDF ၏ စက်တင်ဘာလ တလတာ စစ်ရေးသတင်းအနှစ်ချုပ်တွင် ဖော်ပြထားသည်။
စာတည်း။ ။အောင်ကျော်ဖြိုး
