လူပေါင်း သောင်းနဲ့ချီကို အင်္ဂလိပ် ပရီးမီးယားလိဂ် ဘောလုံးပွဲတွေ တရားမဝင် ထုတ်လွှင့်ခဲ့တဲ့ ယူကေက အမျိုးသား ၅ ဦးကို အင်္ဂါနေ့က ထောင်ဒဏ် ချမှတ်လိုက်ကြောင်း လိဂ်အဖွဲ့က ထုတ်ပြန်ခဲ့ပါတယ်။
ပရီးမီးယားလိဂ်ဟာ တရားမဝင် ထုတ်လွှင့်တဲ့ ကွန်ရက်ကို ဥပဒေအရ အရေးယူမှု စတင်ခဲ့ပြီး ဒါဟာ ကမ္ဘာပေါ်မှာ "အကြီးမားဆုံး တရားစွဲဆိုမှု"မျိုးဖြစ်လာပြီးနောက် ဂိုဏ်းအဖွဲ့ဝင်တွေဟာ ထောင်ဒဏ် ၃ နှစ်မှ ၁၁ နှစ်အထိ အသီးသီး ချမှတ်ခံခဲ့ရပါတယ်။
အသက် ၃၀ နဲ့ ၄၆ နှစ်ကြားရှိ တရားခံတွေဟာ တရားမဝင် ထုတ်လွှင့်တဲ့ ပလပ်ဖောင်းသုံးခုမှာ စာရင်းသွင်းရောင်းချရာကနေ ဝယ်ယူသူတွေနဲ့ ပြန်လည်ရောင်းချသူ ၅၀,၀၀၀ ကျော်ထံဆီက စတာလင်ပေါင် ၇ သန်း (ဒေါ်လာ ၈.၇ သန်း) ကျော် လက်ခံရရှိခဲ့ပါတယ်။
“ဒီအဖွဲ့အစည်းတွေက ပရီးမီးယားလိဂ်ပြိုင်ပွဲတွေ၊ ကမ္ဘာတစ်ဝှမ်းက ရာနဲ့ချီ ချန်နယ်တွေ၊ သောင်းနဲ့ချီပြီး လိုအပ်ချိန်ကြည့်ရှုနိုင်တဲ့ အွန်လိုင်း ရုပ်ရှင်နဲ့ တီဗီရှိုးတွေကို ကြည့်ရှုဖို့ တရားမဝင် ဝင်ရောက်ချိတ်ဆက်ခွင့်ကို ပေးကမ်းခဲ့တာပါ”လို့ ပရီးမီးယားလိဂ်ရဲ့ ထုတ်ပြန်ချက်မှာ ပြောပါတယ်။
ဒီဂိုဏ်းရဲ့ "mastermind" ဖြစ်တဲ့ အသက် ၃၆ အရွယ် Mark Gould ကို အင်္ဂလန်အလယ်ပိုင်းရှိ Chesterfield Justice Centre မှာ ထောင်ဒဏ် ၁၁ နှစ်ချမှတ်ခဲ့ပါတယ်။
ကျန် လေးဦးဟာ ထောင်ဒဏ် ၃ နှစ်မှ ငါးနှစ်အထက် ချမှတ်ခံရပါတယ်။
လိဂ်၏အဆိုအရ ဒီဂိုဏ်းဟာ ၂၀၁၆ မှ ၂၀၂၁ ခုနှစ်အတွင်း ပေါင် ၇.၂ သန်း ရရှိခဲ့တယ်လို့ သိရပါတယ်။ Gould ကိုယ်တိုင် ပေါင် ၁.၇ သန်းကျော် ရယူခဲ့ပါတယ်။
ပုဂ္ဂလိကတရားစွဲဆိုမှုကို လန်ဒန်ရှိ ဟမ်မားစမစ်နဲ့ ဖူဟမ် ကောင်စီမှာ ကုန်သွယ်မှုစံနှုန်းအဖွဲ့နဲ့ ဉာဏပစ္စည်းမူပိုင်ခွင့်ကာကွယ်စောင့်ရှောက်ရေးအဖွဲ့အစည်း FACT (မူပိုင်ခွင့်ခိုးယူမှုဆန့်ကျင်ဖက်ဒရေးရှင်း) တို့က ထောက်ခံထားပါတယ်။
"ဒီကနေ့ စီရင်ချက်ချမှုဟာ အလွန်အဆင့်မြင့်ပြီး စနစ်တကျလည်ပတ်မှုတစ်ခုကို တရားစွဲဆိုခြင်း ပါဝင်တဲ့ ရှည်လျားပြီး ရှုပ်ထွေးတဲ့ ဥပဒေလုပ်ငန်းစဉ်ရဲ့ ရလဒ်ဖြစ်တယ်"လို့ ပရီးမီးယားလိဂ် အထွေထွေအကြံပေး Kevin Plumb က ပြောပါတယ်။
"ခိုးကူးမှုဆိုင်ရာ ဆက်နွှယ်တဲ့ ရာဇဝတ်မှုတွေအတွက် ထုတ်ပြန်ထားဖူးသမျှ အရှည်ကြာဆုံး ထောင်ဒဏ်တွေဖြစ်တဲ့ ချမှတ်လိုက်တဲ့ ပြစ်ဒဏ်တွေဟာ ဒီပုဂ္ဂိုလ်တစ်ဦးချင်းစီရဲ့ လုပ်ရပ်တွေအတွက် တရားမျှတဆီ ရောက်စေဖို့ ကြိုးပမ်းအားထုတ်မှုတွေကို သက်သေပြပြီး ပြစ်မှုတွေရဲ့ ပြင်းထန်မှုနဲ့ အတိုင်းအတာကို ထင်ဟပ်စေပါတယ်။"
ဝန်ထမ်းဒါဇင်ပေါင်းများစွာကို မှီခိုအားထားခဲ့တဲ့ ဒီဂိုဏ်းဟာ "blackout" လို့ခေါ်တဲ့ ယူကေမှာ ပရီးမီးယားလိဂ်ပွဲစဉ်တွေကို တီဗီကနေကြည့်မယ့်အစား ကွင်းအတွင်း ကြည့်ရှုစေတဲ့ ရုပ်သံလွှင့်စည်းမျဉ်းတွေကြောင့် သူတို့ဟာ ဒါကို တိုက်ရိုက်ကြည့်ရှုခွင့်ပေးခြင်းဖြင့် အကျိုးအမြတ်တွေရရှိခဲ့ပါတယ်။
သူတို့ဟာ ယူကေ၊ ကာတာ၊ အမေရိကန်၊ သြစတြေးလျနဲ့ ကနေဒါရှိ ရုပ်သံလွှင့်ဌာနတွေဆီက feed တွေကို ဝင်ရောက်ချိတ်ဆက်ခဲ့ပြီး စက္ကန့်အနည်းငယ်အကြာမှာ ၎င်းတို့ကို ထုတ်လွှင့်ပြသခဲ့ပါတယ်။
ဒီလုပ်ငန်းလည်ပတ်မှုဟာ ပရီးမီးယားလိဂ်ပွဲစဉ်တွေနဲ့ အခြားအကြောင်းအရာတွေကိုကို ကြည့်ရှုခွင့်ပြုတဲ့ မိုဘိုင်းလ်ဖုန်းနဲ့ အွန်လိုင်းအက်ပ်တွေကို ဖန်တီးခဲ့ပါတယ်။
အင်္ဂလန်ပရီးမီးယားလိဂ်ဟာ ၂၀၂၂ မှ ၂၀၂၅ ရာသီများအတွက် စတာလင်ပေါင် (၅) ဘီလီယံခန့် တန်ကြေးရှိတဲ့ ယူကေ တစ်ခုတည်းမှ ထုတ်လွှင့်ခွင့်ရှိမှုနဲ့အတူ ကမ္ဘာ့ဝင်ငွေအကောင်းဆုံးဘောလုံးလိဂ်ဖြစ်ပါတယ်။
(AFP)
