ရန်ကုန် ၊ ဖေဖော်ဝါရီ ၇ ။ ။ “ မဲဆွယ်အပြုံး ” အမည်ရှိသော သရော်စာဖော်ပြမှုကြောင့် တနင်္သာရီဂျာနယ်အား တိုင်းဒေသကြီးအစိုးရအဖွဲ့မှ တရားစွဲဆိုထားသည့်အမှုကို ယနေ့ ဖေဖော်ဝါရီ ၇ ရက်နေ့၊ ထားဝယ်မြို့တရားရုံး၌ အပြီးသတ်အမိန့် ချမှတ်ရန် ရှိသော်လည်း တရားသူကြီးက အမိန့်ချမည့်ရက်ကို ထပ်မံရွှေ့ဆိုင်းလိုက်သည်။
တစ်နှစ်ကျော် ကြာမြင့်နေပြီ ဖြစ်သည့်အဆိုပါအမှုကို တရားသူကြီးက အမိန့်ချရန် အဆင်သင့်မဖြစ်သေးသော ကြောင့် ရွှေ့ဆိုင်းလိုက်ခြင်း ဖြစ်သည်ဟု သိရသည်။
“တရားရုံးကတော့ ပြန်လှန်ထွက်ဆိုချက်တွေ သက်သေတင်ထားတဲ့ဟာတွေကို သေချာဖတ်ရမှာ ရှိတယ် ပေါ့နော်။ အဲ့ဒါတွေ ဖတ်နေတုန်းပဲ ။ အမိန့်ချဖို့ အဆင်သင့်မဖြစ်သေးဘူး။ အဲ့ဒါကြောင့် ထပ်ရွှေ့တယ်” ဟု တနင်္သာရီဂျာနယ် တာဝန်ခံအယ်ဒီတာ ဦးမျိုးအောင်က မဇ္စျိမသို့ ပြောသည်။
အမိန့်ချမည့်ရက်ကို ရွှေ့ဆိုင်းခြင်းသည် ယခု တစ်ခေါက်ပါ အပါအဝင် နှစ်ကြိမ်ရှိပြီ ဖြစ်သည်။ ပြီးခဲ့သည့် ဇန်နဝါရီ ၂၄ ရက်နေ့ကလည်း တရားသူကြီး ခရီးသွားနေသောကြောင့် အမိန့်ချမည့်ရက်ကို ဖေဖော်ဝါရီလ ၇ ရက်သို့ ပြန်လည်ချိန်းဆိုခဲ့ခြင်း ဖြစ်သည်။
ယင်းနောက် ဖေဖော်ဝါရီ ၇ ရက်နေ့တွင် အမိန့်ချရန် အဆင့်သင့်မဖြစ်သေးသောကြောင့် ဖေဖော်ဝါရီ ၁၈ ရက်နေ့သို့ ထပ်မံရွှေ့ဆိုင်းခဲ့ခြင်း ဖြစ်သည်။
၂၀၁၇ ခုနှစ်၊ နိုဝင်ဘာလ ၂၀ ရက်ထုတ် တနင်္သာရီအပတ်စဉ် အတွဲ ၅ အမှတ် ၁၇ တွင်ဖော်ပြပါရှိသည့် ကလောင်ရှင် မူးဆေးအိုး၏ “မဲဆွယ်အပြုံး” သရော်စာသည် တနင်္သာရီတိုင်းဒေသကြီးဝန်ကြီးချုပ်နှင့် တိုင်းအစိုးရအဖွဲ့၏ ဂုဏ်သိက္ခာကို ထိခိုက်သည်ဟုဆိုကာ အရေးယူပေးရန် ထားဝယ်မြို့နယ်တရားရုံးကို ဦးတိုက်လျှောက်ထားခဲ့သည့်အမှု ဖြစ်သည်။
ယင်းအမှုအား သတင်းမီဒီယာဥပဒေပုဒ်မ ၂၅ (ခ)အရ စွဲချက်တင်ရန် ထားဝယ်မြို့နယ်တရားရုံးက ၂၀၁၈ ခုနှစ် အောက်တိုဘာလ ၁ ရက်တွင် အမိန့်ချခဲ့သည်။
သတင်းမီဒီယာ ဥပဒေပုဒ်မ ၂၅ (ခ) အရ အပြစ်ရှိကြောင်း အမိန့်ချမှတ်မည်ဆိုလျှင် ဒဏ်ငွေ အနည်းဆုံး ကျပ် သုံးသိန်းမှ ကျပ်ဆယ်သိန်းအထိ ဒဏ်ငွေချမှတ်ခံရမည် ဖြစ်သည်။
တနင်္သာရီဂျာနယ်သည် တနင်္သာရီတိုင်းဒေသကြီးအတွင်းထုတ်ဝေသည့် ဂျာနယ်တစ်စောင်ဖြစ်ပြီး တနင်္သာရီ တိုင်းအတွင်းရှိ အမြင့်ဆုံး အာဏာပိုင်အဖွဲ့အစည်းက တရားစွဲဆိုမှုကို ခံထားရခြင်းဖြစ်သည်။
