ဆင်းရဲသော ပြည်နယ်နှင့်တိုင်းများတွင်"ကျေးရွာတစ်ရွာ ထုတ်ကုန်တစ်ခု " အဆို ရှုံးနိမ့်

ဆင်းရဲသော ပြည်နယ်နှင့်တိုင်းများတွင်"ကျေးရွာတစ်ရွာ ထုတ်ကုန်တစ်ခု " အဆို ရှုံးနိမ့်

နေပြည်တော်၊ ဖေဖော်ဝါရီ ၂၀ ။                    ။ မြန်မာနိုင်ငံအတွင်းရှိ ဆင်းရဲသောပြည်နယ်နှင့်တိုင်းများတွင် " ကျေးရွာတစ်ရွာ၊ ထုတ်ကုန်တစ်ခု " အစီအစဉ်အား သက်ဆိုင်ရာဝန်ကြီးဌာနများတွင် ဘဏ္ဍာငွေတစ်ရပ် ထည့်သွင်းရေးဆွဲအကောင်အထည်ဖော်ရန်အဆို အမျိုးသားလွှတ်တော်တွင် ယနေ့ ရှုံးနိမ့်ခဲ့သည်။

ရခိုင်ပြည်နယ် မဲဆန္ဒနယ် အမှတ်(၁၁)မှ အမျိုးသားလွှတ်တော်ကိုယ်စားလှယ် ဒေါ်ထုမေတင်သွင်းသည့် အဆိုဖြစ်ပြီး ကျေးလက်ဒေသဖွံ့ဖြိုးတိုးတက်ရေးအတွက် ဟု သိရသည်။

ယင်းအဆိုကို ယနေ့ဖေဖော်ဝါရီ ၂၀ရက်နေ့ အမျိုးသားလွှတ်တော်တွင် မဲခွဲဆုံးဖြတ် ရာတွင် ဆန္ဒမဲ ပေးခွင့်ရှိသူပေါင်း ၁၉၄ ဦးအနက် ထောက်ခံမဲ ၇၁မဲ၊ ကန့်ကွက်မဲ ၁၁၆ မဲ ၊ ကြားနေမဲ ၇ မဲဖြင့် ရှုံးနိမ့်ခဲ့ခြင်းဖြစ်သည်။

ယင်းအဆိုနှင့်ပတ်သက်ပြီး စိုက်ပျိုးမွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီးဦးလှကျော်က လွှတ်တော်တွင် ပြန်လည် ပြောကြားခဲ့သည်။

လက်ရှိတွင် နိုင်ငံတော်၏ ဘဏ္ဍာငွေရင်းနှီးမြှပ်နှံမှုတွင် ဘဏ္ဍာငွေကြေးဆိုင်ရာ၊နည်းပညာရပ်ဆိုင်ရာ၊ လူ့စွမ်းအား အရင်းအမြစ်များအတွက် လိုအပ်ချက်များရှိနေသည့် အခြေအနေကို ထည့်သွင်းစဉ်းစားရန် လိုသည်ဟု ၎င်းကဆိုသည်။

ထို့ပြင် “ရင်းနှီးမြှပ်နှံမှုကို အကျိုးရှိထိရောက်စွာ သုံးစွဲ အကောင်အထည်ဖော်ဖို့ အတွက်ကျေးလက်ဒေသ ဖွံ့ဖြိုးတိုးတက်ရေး စီမံကိန်းတွေကနေပြီးတော့ ကျေးရွာရဲ့ အခြေခံ အဆောက်အအုံ လိုအပ်ချက်တွေကို ဖြည့်ဆည်းဆောင်ရွက် ပေးလျက်ရှိနေဆဲ အခြေအနေ ၊ ဒီစီမံကိန်းတွေကနေ  ကျေးလက်နေပြည်သူတွေရဲ့  စွမ်းဆောင်ရည်တွေကို   မြှင့်တင်တည်ဆောက်ပေးနိုင်ရေးကို   ဆောင်ရွက်ပေးလျက် ရှိနေဆဲ ဖြစ်တဲ့ အခြေအနေ နဲ့ အခြေခံကောင်းတွေ အပေါ်မှာ  စနစ်တကျ အကောင်အထည်ဖော်နိုင်ဖို့အတွက် အချိန်ယူဆောင်ရွက်ရမယ့် အခြေအနေများရှိနေသေးတဲ့အတွက်” ဟု ပြောကြားသည်။

ထို့နောက် အထက်ပါ  အဆိုကို လွှတ်တော်တွင်မှတ်တမ်းတင်ထားရှိနိုင်ရန် ဆုံးဖြတ်ခဲ့ကြသည်။

အဆိုရှင်ဒေါ်ထုမေက ၎င်းတင်သွင်းခဲ့သည့် အဆိုသည် ကျေးလက်နေပြည်သူ မဲဆန္ဒရှင်များ၏ အလုပ်အကိုင်ကို ဖန်တီးပေးရန်အတွက် တက်လာသည့် အစိုးရသစ်တစ်ရပ်အတွက် တာဝန်ရှိကြောင်း ၎င်းက လွှတ်တော်အစည်းအဝေးအပြီးတွင် ပြောသည်။

“ဒီအဆိုကိုမှတ်တမ်းတင်တာနဲ့ပတ်သတ်ပြီးတော့ သက်ဆိုင်ရာ ဝန်ကြီးဌာနများ သို့မဟုတ် အစိုးရ ဝန်ကြီးဌာနများအနေနဲ့ အရည်အသွေးမြင့်အောင်ကျွန်မတို့ဆောင်ရွက်ရမယ်၊ အိမ်နီးနားချင်းနိုင်ငံတွေ အပါအဝင် ကျေးရွာတစ်ရွာထုတ်ကုန်တစ်ခု(One Village One Product)နဲ့ပတ်သတ်ပြီးတော့ တိုးတက်နေတဲ့ နိုင်ငံတွေ အများကြီးပဲ ရှိတယ်။ မြန်မာနိုင်ငံ ရေမြေသယံဇာတ ကလည်းကောင်းမွန်တယ်။ ဒါက အလွယ်ဆုံးနည်းလမ်းတောင်မှ မဆောင်ရွက်နိုင်ဘူးဆိုလို့ရှိရင် ဒါ အစိုးရရဲ့ Capacity(လုပ်နိုင်စွမ်း) ပေါ်မှာ မေးခွန်းထုတ်စရာမျိုး” အဆိုရှင်ဒေါ်ထုမေက ပြောသည်။

မြန်မာနိုင်ငံတွင် ရွာပေါင်းခြောက်သောင်းကျော် ရှိသည့် အနက် ထိုရွာအားလုံးတွင် ကျေးရွာတစ်ရွာ ထုတ်ကုန်တစ်ခု ထုတ်လုပ်ရမည်မဟုတ်ကြောင်း သို့ပေမယ့် ၎င်း၏ အဆိုကို ထိုသို့ ကျေးရွာအားလုံးတွင် အကောင်အထည်ဖော် လုပ်ဆောင်ရမည်ဟု ကိုယ်စားလှယ်အချို့ လွဲမှားပြီး တင်ပြခဲ့သည်ကို တွေ့ရသည်ဟု ဒေါ်ထုမေက ပြောခဲ့သည်။

 

Mizzima Weekly