ချင်းပြည်နယ် ၊ မတူပီမြို့နယ် ၊ ဝေလူးကျေးရွာကို လေကြောင်းတိုက်ခိုက်မှုကြောင့် ကလေးငယ် ရှစ်ဦးအပါအဝင် ၁၁ဦး သေဆုံးခဲ့သည့် ဖြစ်ရပ်အား တုံ့ပြန်သည့်အနေဖြင့် စစ်ရေးအရှိန်မြှင့်သွားမည်ဟု CDF - Matupi က နိုဝင်ဘာလ ၁၈ ရက်တွင် သတင်းထုတ်ပြန်သည်။
ယင်းသို့ စစ်ကောင်စီတပ်က အပြစ်မဲ့ပြည်သူများအပေါ် လေကြောင်းမှ တိုက်ခိုက်ခဲ့မှုအား လုံးဝကန့်ကွက်ရှုတ်ချကြောင်းနှင့် စစ်ရေးအရှိန်ပိုမိုမြှင့်တင်ကာ စစ်အာဏာရှင်စနစ် ပျက်သုဥ်းသည်အထိ တိုက်ပွဲဝင်သွားမည်ဖြစ်ကြောင်း ချင်းလဲန်းကာကွယ်ရေး တပ်ဖွဲ့ - (မတူပီ) CDF - Matupi ၏ ထုတ်ပြန်ချက်တွင် ဖော်ပြထားသည်။
ဝေလူးကျေးရွာကို စစ်ကောင်စီတပ်က နိုဝင်ဘာလ ၁၅ရက်နေ့တွင် ဂျက်တိုက်လေယာဥ်ဖြင့် ဗုံးကြဲခြင်း ၊ စက်သေနတ်များဖြင့် တိုက်ခိုက်ခြင်းကြောင့် အသက် ၁၅နှစ် အောက် ကလေးရှစ်ဦး ၊ CDM ကျောင်းဆရာတဦးနှင့် အရပ်သား နှစ်ဦး စုစုပေါင်း ၁၁ဦး သေဆုံးခဲ့ပြီး နိုဝင်ဘာ ၁၆ရက်နေ့တွင် သင်္ဂြိုဟ်ခဲ့ခြင်းဖြစ်သည်။
ယင်းအပြင် ကလေးငယ်တစ်ဦးအပါအဝင် အရပ်သား လေးဦးထိခိုက်ဒဏ်ရာ ရရှိခဲ့ပြီး လူနေအိမ် ၂၂လုံး ၊ ဘုရားကျောင်း တဆောင်နှင့် စာသင်ကျောင်း နှစ်ဆောင်တို့ ထိခိုက်ပျက်စီးခဲ့ကြောင်း သိရသည်။
“အဲဒီနယ်မြေမှာ တိုက်ပွဲမရှိဘဲနဲ့ အကြောင်းမဲ့ သက်သက် တိုက်ခိုက်ခံခဲ့ရတာပါ။ သေဆုံးသူတွေကိုနောက်ရက်မှာပဲ ခရစ်ယာန်ထုံးတမ်းစဥ်လာအရ သင်္ဂြိုဟ်ခဲ့ပါတယ်” ဟု ပြည်သူ့အုပ်ချုပ်ရေးတာဝန်ရှိသူက မဇ္စျိမကိုပြောသည်။
၎င်းတို့အနေဖြင့် သေဆုံးဒဏ်ရာရရှိသူများနှင့် နေအိမ်ပျက်စီးဆုံးရှုံးသူများအတွက် နေထိုင်စားသောက်ရေးနှင့် အခြားလိုအပ်သောအကူအညီများ အရေးပေါ်တုံ့ပြန်ကူညီရန် ပြင်ဆင်ဆောင်ရွက်လျက်ရှိကြောင်း ဆိုသည်။
ထိခိုက်သေဆုံးသူများအတွက် ကူညီရန် ၎င်းတို့ ပအဖ အနေဖြင့် ငွေကြေး မတည်ထားပြီး NUG လူသားချင်းစာနာ ထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာန ၊ အမျိုးသမီး ၊ လူငယ် ၊ ကလေးသူငယ်ဆိုင်ရာဝန်ကြီးဌာနနှင့် ပြည်ပရောက် မတူအဖွဲ့အစည်း လူပုဂ္ဂိုလ်များမှငွေကြေးအချို့ထည့်ဝင်ထားကာ အလှူရှင်များအနေဖြင့် ပါဝင်ပေးကြပါရန်လည်း မေတ္တာရပ်ခံထားသည်။
နိုဝင်ဘာလ ၁၅ရက် ည ၁၁နာရီ ၄၅မိနစ်အချိန်ကလည်း မင်းတပ်မြို့နယ် ၊တိုက်နယ်(၁) ဘက်ရှိကျေးရွာတရွာကို မြေပြင်တွင် တိုက်ပွဲဖြစ်ပွားခြင်းမရှိဘဲ စစ်ကောင်စီတပ်က လေယာဥ်ဖြင့် ဗုံးနှစ် ကြိမ်ကြဲချတိုက်ခိုက်ခဲ့ရာ လူနေအိမ်လေးလုံး ပျက်စီးခဲ့ကြောင်း သိရသည်။
စာတည်း ။ ။ ဖူးသိမ်ကျ
စာမူတည်းဖြတ်။ ။အောင်ကျော်ဖြိုး
