၂၀၂၄ ဇွန်လ ၃၀ ရက်မှာ ကုန်ဆုံးမယ့် ဘဏ္ဍာရေးနှစ်အတွက် ပရီးမီးယားလိဂ်စံချိန်တင် ဝင်ငွေကိန်းဂဏန်း ပေါင် ၆၄၈.၄ သန်း (ဒေါ်လာ ၇၈၄ သန်း) ကို မန်ချက်စတာယူနိုက်တက်က ကြာသပတေးနေ့က ထုတ်ပြန်ခဲ့ပါတယ်။
ဒီကိန်းဂဏန်းဟာ မနှစ်ကထက် ၁၁ ရာခိုင်နှုန်း မြင့်တက်လာပြီး ၂၀၁၉ မှာ ယူနိုက်တက်က တင်ထားတဲ့ အရင်လိဂ်စံချိန်ကို ကျော်လွန်ခဲ့တာဖြစ်ပါတယ်။
ယူနိုက်တက်ဟာ ပြီးခဲ့တဲ့ရာသီက ငွေကြေးပိုင်းအရ ပိုအမြတ်ရတဲ့ ချန်ပီယံလိဂ်ထက် ယူရိုပါလိဂ်မှာ ကစားခဲ့ပေမယ့်လည်း စံချိန်တင် ဝင်ငွေတွေ ရရှိခဲ့တာပါ။
ကလပ်အသင်းဟာ ၂၀၂၃-၂၄ ရာသီအတွက် ဝင်ငွေ ပေါင် သန်း ၆၅၀ နဲ့ ၆၈၀ သန်းကြားရှိမယ်လို့လည်း ခန့်မှန်းထားပါတယ်။
INEOS ဓာတုဗေဒပစ္စည်းကုမ္ပဏီကို တည်ထောင်သူ ဂျင်မ် ရက်ကလစ်ဖ်ဟာ ကလပ်မှာ ရှယ်ယာ ၂၅ ရာခိုင်နှုန်း ရယူပိုင်ဆိုင်ဖို့ နီးစပ်နေချိန်မှာ ဒီကြေညာချက် ထွက်ပေါ်လာတာဖြစ်ပါတယ်။
၂၀၂၂-၂၃ ရာသီအတွင်း နောက်ဆုံးရလဒ်တွေအရ မန်ချက်စတာယူနိုက်တက်အမျိုးသားအသင်းဟာ ပရီးမီးယားလိဂ်မှာ အဆင့် ၃ နေရာမှာရှိခဲ့ပြီး လိဂ်ဖလားကို ဆွတ်ခူးနိုင်ခဲ့ပါတယ်။
အမျိုးသမီးအသင်းဟာ အမျိုးသမီးစူပါလိဂ်မှာ ဒုတိယနဲ့ ပြီးဆုံးခဲ့ပြီး FA ဖလားမှာ ဒုတိယရရှိခဲ့ပါတယ်။
၂၀၁၃ ကတည်းက ပရီးမီးယားလိဂ်ချန်ပီယံဆု မရရှိခဲ့တဲ့ ယူနိုက်တက်အမျိုးသားအသင်းဟာ တနင်္ဂနွေနေ့မှာ ချန်ပီယံ မန်ချက်စတာစီးတီးနဲ့ ယှဉ်ပြိုင်ရမယ့် လိဂ်ပွဲစဉ်မတိုင်ခင် လက်ရှိဇယားမှာ အဆင့် (၈) နေရာမှာ ရပ်တည်နေပါတယ်။
