စင်္ကာပူဒေါ်လာ ၂ ဒသမ ၈ ဘီလီယံ ရှိ ငွေကြေးခဝါချမှု အမှုကိစ္စဖြင့် ဆက်စပ်နေသည့် လူပုဂ္ဂိုလ်များအတွက် ကုမ္ပဏီများ ကူညီတည်ထောင်ပေးခဲ့သော စင်္ကာပူနိုင်ငံသားများသည် ကုမ္ပဏီများမှ ၎င်းတို့၏ အမည်များကို စတင်ဖယ်ရှားခဲ့ကြောင်း သိရသည်။ စာရင်းအင်းနှင့် ကော်ပိုရိတ် စည်းကမ်းထိန်းသိမ်းရေး အာဏာပိုင်အဖွဲ့ (Acra) က စုံစမ်းစစ်ဆေးမှုတခု လုပ်ဆောင်နေစဉ် အဆိုပါ စင်္ကာပူနိုင်ငံသားများက ၎င်းတို့၏ အမည်များကို ဖယ်ရှားခြင်း ဖြစ်သည်။

ဩဂုတ် ၁၅ ရက် ငွေကြေးခဝါချမှု တိုက်ဖျက်ရေး စီးနင်းဖမ်းဆီးမှုအတွင်း ဖမ်းဆီးခံရသည့် နိုင်ငံခြားသားများအနက် တချို့ တည်ထောင်ထားသည့် ကုမ္ပဏီများတွင် ၎င်းတို့ကို ဒါရိုက်တာများ၊ အတွင်းရေးမှူးများ သို့မဟုတ် ရှယ်ယာရှင်များအဖြစ် ယခင်က စာရင်းသွင်းထားခဲ့ခြင်း ဖြစ်သည်။ 

စုစုပေါင်းအားဖြင့် ကော်မာရှယ် ရေးရာဌာန (CAD) သည် အမျိုးသား ကိုးဦးနှင့် အမျိုးသမီးတဦးတို့ကို ဖမ်းဆီးခဲ့သည်။

ထို့ပြင် ငွေကြေးခဝါချမှုကိစ္စတွင် စွပ်စွဲခံထားရသည့် တရားခံတချို့၏ ဇနီးများအပါအဝင် ဖမ်းဆီးခံရသူများ၏ စပ်တူလုပ်ဖက်များ ဖွဲ့စည်းတည်ထောင်ထားသည့် ကုမ္ပဏီများတွင် စင်္ကာပူနိုင်ငံသားများကို စာရင်းသွင်းထားခဲ့သည်။

ငွေကြေးခဝါချမှု ကိစ္စနှင့် ဆက်နွယ်သည့် လုပ်ဆောင်ဆဲ စုံစမ်းစစ်ဆေးမှုတခုအတွင်း ကော်ပိုရိတ် ဝန်ဆောင်မှု ပေးအပ်သည့် လုပ်ငန်းကုမ္ပဏီ (CSPs) တချို့နှင့် ဆက်သွယ်ထားကြောင်း Acra က သည်စထရိတ်တိုင်းမ်ကို အတည်ပြုသည်။

နိုင်ငံခြားသားများသည် စင်္ကာပူတွင် ကုမ္ပဏီတခု ဖွဲ့စည်းတည်ထောင်ရန် CSPs များ အပါအဝင် မှတ်ပုံတင်ထားသည့် စာတွဲဖွင့်အေးဂျင့်တခုနှင့် ဆက်ဆံပတ်သက်ရန် လိုအပ်သည်။

ထို့ပြင် ၎င်းတို့သည် စင်္ကာပူတွင် နေထိုင်လျက်ရှိသော ဒါရိုက်တာ အနည်းဆုံး တဦးကို ခန့်အပ်ရလိမ့်မည် ဖြစ်သည်။ ထိုသူသည် နိုင်ငံသားတဦး၊ အမြဲတမ်း နေထိုင်သူ သို့မဟုတ် entrepreneur pass သို့မဟုတ် employment pass ကိုင်ဆောင်သူတဦး ဖြစ်နိုင်သည်။

ယခင်က Sprout အမည်ရှိပြီး လက်ရှိ Grof အမည်ရ ကော်ပိုရိတ်ဝန်ဆောင်မှုပေးအပ်သူ ကုမ္ပဏီက ယင်းအနေဖြင့် ဩဂုတ် ၂၄ ရက်တွင် ကုမ္ပဏီတချို့နှင့် ဝန်ဆောင်မှုများ အဆုံးသတ်ခြင်းကို စတင်ခဲ့သည်ဟု ပြောသည်။ ယင်းလုပ်ဆောင်မှုသည် စက်တင်ဘာ အစောပိုင်းတွင် ပြီးစီးခဲ့သည်။

ငါးခုထက် နည်းသည့် ကုမ္ပဏီများ ပါဝင်ပတ်သက်ခဲ့သည်ဟု Grof ၏ ပူးတွဲတည်ထောင်သူ မစ္စတာ ဂျက်ဆင် လင်မ်က ပြောသော်လည်း အရေအတွက် အတိအကျကို ပြောရန် ငြင်းဆန်သည်။

“သတင်း ထွက်လာချိန်မှာ ကျွန်တော်တို့မှာ တရားခံ ၁၀ ယောက်နဲ့ ဆက်စပ်နေတဲ့ ဖောက်သည်တွေများ ရှိမလား ဆိုတာကို သိရဖို့ ကျွန်တော်တို့ လုပ်ငန်းတွင်း စစ်ဆေးမှုတွေ လုပ်ခဲ့တယ်” ဟု မစ္စတာ လင်မ်က ပြောသည်။ ၎င်းသည် အသက်ဝင်လည်ပတ်နေသော ကုမ္ပဏီ ၁,၄၀၀ ခန့်၏ အတွင်းရေးမှူး သို့မဟုတ် ဒါရိုက်တာအဖြစ် မှတ်ပုံတင်ထားကြောင်း သည်စထရိတ်တိုင်းမ်က သိရှိထားသည်။

မစ္စတာ လင်မ်က တရားခံများ၏ လုပ်ဖော်ကိုင်ဘက် သုံးဦးနှင့် ဆက်စပ်သော ကုမ္ပဏီများ၏ အတွင်းရေးမှူး သို့မဟုတ် ဒါရိုက်တာအဖြစ် သူ့အမည်ကို စာရင်းသွင်းထားသည်ကို တွေ့ခဲ့သည်ဟု ပြောသည်။

တရားခံ ၁၀ ဦးနှင့် ဆက်စပ်နေသည့် လူ ၂၄ ဦး၏ အမည်များကို သည်စထရိတ်တိုင်းမ်က အစောပိုင်းက ဖော်ပြခဲ့သည်။ သံသယဖြစ်ဖွယ် လုပ်ငန်းကိစ္စများအတွက် အာရုံစိုက်စေရန် အဖိုးတန် သတ္တုနှင့် ကျောက် ကုန်သည်များထံ ဥပဒေရေးရာ ဝန်ကြီးဌာနက ပေးပို့ခဲ့သည့် စာရင်းတခုတွင် ၎င်းတို့ ပါဝင်နေခဲ့သည်။

“သည် စထရိတ်တိုင်းမ်က အဲဒီ လုပ်ဖော်ကိုင်ဘက်တွေရဲ့ အမည်တွေကို ထုတ်ပြန်ဖော်ပြတုန်းက ကျွန်တော်တို့က အဲဒါကို ကျွန်တော်တို့ရဲ့ လုပ်ငန်းတွင်း စစ်ဆေးမှုတွေနဲ့ ပူးပေါင်းဆောင်ရွက်မှုမှာ အသုံးပြုခဲ့တယ်။ အဲဒါက အင်မတန် အထောက်အကူဖြစ်ခဲ့တယ်” ဟု မစ္စတာ လင်မ်က ပြောသည်။
စာရင်းစစ်ခြင်းနှင့် စစ်ဆေးခြင်းများ လုပ်ဆောင်ရန် စက်တင်ဘာလကတည်းက ၎င်းတို့ ကုမ္ပဏီအနေဖြင့် အာဏာပိုင်များနှင့် ပူးပေါင်းလုပ်ဆောင်နေခဲ့ကြောင်း ၎င်းက ပြောသည်။

ရဲဝန်ထမ်း ၄၀၀ ကျော် ပါဝင်သည့် တာဝန်ရှိသူများသည် ဩဂုတ် ၁၅ ရက်က ငွေကြေးခဝါချမှု တိုက်ဖျက်ရေး စစ်ဆင်ရေးတခုအဖြစ် နိုင်ငံရှိ အိမ်ယာ၊ အဆောက်အအုံတချို့ကို တပြိုင်နက်တည်း စီးနင်းခဲ့သည်။ နောက်တနေ့တွင် မူလအားဖြင့် တရုတ်နိုင်ငံမှဖြစ်သော နိုင်ငံခြားသား ၁၀ ဦးကို ငွေကြေးခဝါချမှု၊ လိမ်လည် အတုပြုမှု၊ ဖမ်းဆီးခြင်းကို ခုခံမှု အပါအဝင် စွဲချက်များဖြင့် တရားစွဲဆိုခဲ့သည်။

ယင်းသည် စင်္ကာပူ၏ အဆိုးဝါးဆုံးသော ငွေကြေးခဝါချမှု ဖြစ်သလို ကမ္ဘာ့အကြီးဆုံးငွေကြေးခဝါချမှုတခုလည်း ဖြစ်သည်။