မြန်မာနိုင်ငံမှာ လူသားချင်းစာနာမှုအကူအညီပေးရေး အာဆီယံသံတမန်များ တိုက်ခိုက်ခံရမှုအပေါ် နိုင်ငံတကာက ပြစ်တင်ရှုတ်ချလိုက်ပြီး နိုင်ငံအတွင်း အကြမ်းဖက်မှုများ အဆုံးသတ်ရေးအတွက် တောင်းဆိုထားကြပါတယ်။
ရှမ်းပြည်နယ်တောင်ပိုင်း ဆီဆိုင်မြို့နယ်အတွင်းမှာ စစ်ဘေးရှောင်တွေနဲ့ တွေ့ဆုံဖို့ လာတဲ့ အာဆီယံသံတမန်တွေရဲ့ ယာဉ်တန်းက မေလ ၈ ရက်နေ့ မနက်ပိုင်း က ပစ်ခတ်မှုကိုခံခဲ့ရတာဖြစ်ပါတယ်။
ဒီဖြစ်စဉ်ဟာ အာဆီယံခေါင်းဆောင်များထိပ်သီးအစည်းအဝေးမတိုင်ခင်မှာပဲ ဖြစ်ခဲ့တာပါ။
စစ်တပ်အစောင့်အကြပ်နဲ့သွားတဲ့ အာဆီယံလူသားချင်းစာနာကူညီမှု ညှိနှိုင်းဆောင်ရွက်ရေးဌာန AHA Center ရဲ့ယာဉ်တန်း ပစ်ခတ်ခံရမှုသတင်းအပေါ်မှာ အလွန်တရာစိုးရိမ်မိတယ်လို့ အမေရိကန်နိုင်ငံခြားရေးဌာန ပြောခွင့်ဆိုခွင့်ရှိသူ Matthew Miller က ထုတ်ပြန်ပါတယ်။
စစ်ကောင်စီရဲ့အကြမ်းဖက်မှုတွေနဲ့ တရားဥပဒေစိုးမိုးမှုကို မျက်ကွယ်ပြုတာတွေကြောင့် မြေပြင်မှာ မတည်ငြိမ်မှုပိုဖြစ်လာချိန်မှာပဲ ရှမ်းပြည်မှာ အခုလို အာဆီယံယာဉ်တန်းပစ်ခတ်ခံရတာလို့ အမေရိကန်နိုင်ငံခြားရေးဌာန ထုတ်ပြန်ချက်မှာဖော်ပြပါတယ်။
သံတမန်တွေနဲ့ အရပ်သားတွေကို အကာအကွယ်ပေးရမယ်ဆိုတဲ့ အချက်အပါအဝင် နိုင်ငံတကာလူသားချင်းစာနာမှု ဥပဒေကို စစ်ကောင်စီအနေနဲ့ လိုက်နာဖို့ တာဝန်ရှိတယ်လို့လည်းဖော်ပြပါတယ်။
