ရန်ကုန်၊ သြဂုတ်လ ၁၉ ။ ။ ကြက်ငှက်တုပ်ကွေး ရန်ကုန်တွင် တွေ့ရှိသည့်နေ့မှစ၍ ရေချိုငါးစျေးများတက်သွားခဲ့ပြီး လက်ရှိအချိန်တွင် ပုံမှန်စျေးနူန်းသာရှိနေကြောင်း ကြည့်မြင်တိုင်စံပြငါးစျေးမှ စျေးသည်ဒေါ်ခင်ဌေးက ပြောသည်။
ဇူလိုင်လကုန်ရက်များ၌ ရန်ကုန်မြို့တွင် ကြက်ငှက်တုပ်ကွေးသတင်းများ ထွက်ပေါ်လာချိန်တွင် ငါးစျေးများ ၂ ဆ တက်ခဲ့သည်။
" အဲဒီအချိန်ကတော့ ငါးတွေ စျေးထိုးတက်သွားတာ ။ ဘယ်လို တက်သလဲဆို ငါးမြစ်ချင်း ၃၀၀၀ စျေး ကနေ ၃၅၀၀၊ ၄၀၀၀ တို့ ဝယ်ရတယ်။ ငါးကြင်း ၅၀၀၀ စျေးကနေ ၆၅၀၀ စျေးဝယ်ရတယ်။ ငါးတန် ၃၀၀၀ စျေးကနေ ၃၅၀၀ စျေးဝယ်ရတယ် ။ စျေးမှာလည်း အဲဒီလိုပဲ လှည့်ပတ်ပြီး ရောင်းရတာပေါ့နော်"ဟု ကြည့်မြင်တိုင်စံပြငါးစျေးတွင် ဒိုင်များထံမှ ငါးလာဝယ်နေသူ ငါးသည် ဒေါ်ခင်ဌေးက ပြောသည်။
လက်ရှိတွင် ငါးမြစ်ချင်း၊ ငါးကြင်း၊ ငါးတန် အပါအဝင် ငါးစျေးများ ပုံမှန်ပေါက်စျေးဖြင့် ရောင်းဝယ်လျက် ရှိသည်။
"ဝယ်သူတွေလား ။ ခါတိုင်းလိုတော့ဝယ်ပါတယ်"ဟု ငါးစျေးသည် ဒေါ်မြင့်မြင့်စန်းကဆိုသည်။
လက်ရှိအချိန်တွင် ငါးစျေးနူန်းများသည် ပုံမှန်ယခင်နှစ်ကနှင့်တူညီနေပြီး တစ်ရာ၊ နှစ်ရာခန့်သာ ကွာခြားမှု ရှိနေသည်ဟု ငါးသည်တစ်ဦးက ပြောသည်။
ရန်ကုန်မြို့၊ မရမ်းကုန်မြို့နယ်ရှိ ကြက်ခြံတစ်ခုတွင် ကြက်ငှက်တုပ်ကွေးတွေ့ရှိပြီးနောက် ကြက်သားစျေးများကျဆင်းခဲ့ပြီး အသီးအရွက်စျေးများနှင့် ငါးစျေးများ တက်လာခဲ့သည်။
သို့သော် ကြက်သားစျေးမှာ စျေးနှုန်း အနည်းငယ်တက်လာသော်လည်း မူလစျေးနှုန်း ပြန်မရောက် ရှိသေးသော်လည်း ငါးစျေးမှာ ပုံမှန်စျေးသို့ ရောက်ရှိနေသည်။
