ကရင်အမျိုးသားအစည်းအရုံး (KNU) တပ်မဟာ (၃) ထိန်းချုပ်နယ်မြေဖြစ်သည့် ပဲခူးတိုင်း၊ မုန်းမြို့နယ်တွင် စစ်ကောင်စီတပ်က အရပ်သားများကို ပစ်မှတ်ထားကာ လေကြောင်းတိုက်ခိုက်ခြင်း၊ လက်နက်ကြီးပစ်ခတ်ခြင်းတို့ကြောင့် စစ်ဘေးရှောင်ရသည့် ကျေးရွာအရေအတွက် ၂၆ ရွာအထိ ရှိလာကြောင်း KNU ဗဟိုက ယနေ့ စက်တင်ဘာလ ၃ ရက်နေ့တွင် ထုတ်ပြန်သည်။
မုန်းမြို့နယ်တွင် ပြီးခဲ့သည့် ဩဂုတ်လ ၁၉ ရက်နေ့မှစ၍ တပ်မဟာ (၃) ကရင်အမျိုးသားလွတ်မြောက်ရေးတပ်မတော် (KNLA)၊ ကရင်အမျိုးသားကာကွယ်ရေးတပ် (KNDO) ပူးပေါင်းတပ်ဖွဲများနှင့် စစ်ကောင်စီတပ်သားများအကြား တိုက်ပွဲဖြစ်ပွားနေကြောင်း KNU ထံက သိရသည်။
အဆိုပါတိုက်ပွဲအတွင်း စစ်ကောင်စီတပ်က တိုက်ပွဲဖြစ်ပွားရာ အနီးတစ်ဝိုက်အား KH-W ဂျက်ဖိုက်တာတစ်စီးနှင့် MI-35 ဟယ်လီကော်ပတာတို့ဖြင့် လေကြောင်းတိုက်ခိုက်ခြင်း၊ စစ်ကောင်စီအထိုင်တပ်ရင်းများမှ လက်နက်ကြီး ပစ်ခတ်ခြင်းတို့ကြောင့် အနီးအနားရှိ ကျေးရွာ ၂၆ ရွာ ထွက်ပြေးတိမ်းရှောင်နေခြင်းဖြစ်သည်။
" တော်တော်များများက အခု တော်တော် ခက်ခက်ခဲခဲနဲ့ ရင်ဆိုင်ကြုံတွေ့နေရတာပေါ့။ သစ်ချဆိပ်ဘက်ရယ်၊ ဒီဘက်မှာဆိုရင် ကြက်တက်ညောင်ပင်သာနဲ့ ကရင်ကျ၊ သမန်းကျင်းဘက်မှာ စစ်ဘေးရှောင်တွေ တော်တော်များများရှိပါတယ်။ စစ်ဘေးရှောင်ကူညီကယ်ဆယ်ရေးအတိုင်းအတာနဲ့ စာရင်းကောက်ခံတာ အကုန်တော့ မရသေးဘူး" ဟု ကရင်အရေးပေါ်ကူညီကယ်ဆယ်ရေးကော်မတီ (မုန်းမြို့နယ်)တာဝန်ရှိသူတစ်ဦးက ယမန်နေ့ စက်တင်ဘာလ ၂ ရက်နေ့က မဇ္ဈိမကိုပြောသည်။
စစ်ဘေးရှောင်ကျေးရွာ ၂၆ ရွာအနက် KNU အနေဖြင့် ကျေးရွာ ၁၃ ရွာကို တိတိကျကျ စာရင်းကောက်ယူထားနိုင်ပြီး အဆိုပါ ကျေးရွာများတွင် စစ်ဘေးရှောင်နေရသည့် ဒေသခံ စုစုပေါင်း ၆,၃၂၉ ဦး ရှိကြောင်း KNU က ဖော်ပြထားသည်။
ဆက်လက်၍ KNU အနေဖြင့် ညောင်ပင်သာကျေးရွာ၊ ကြက်တက်ညောင်ပင်သာကျေးရွာ၊ ကရင်ကျကျေးရွာ၊ ယောက်သဝကျေးရွာ၊ လှည်းလမ်းကူးကျေးရွာ၊ တလအိုင်ကျေးရွာ၊ ကျောက်ကြီးဘက်ကမ်းကျေးရွာ၊ နှောတောကျေးရွာ၊ မဲဖလန်ကျေးရွာ၊သရက်တန်းကျေးရွာ၊ သမန်းကျင်းကျေးရွာ၊ ဘွာအိမ်စုကျေးရွာနှင့် မိကျောင်းခေါင်းကျေးရွာ စသည့် ကျေးရွာ ၁၃ ရွာမှ စစ်ဘေးရှောင်လူဦးရေစာရင်းအား ဆက်လက်ကောက်ခံလျက်ရှိကြောင်း သိရသည်။
ဒေသခံများအနေဖြင့် ဘေးလွတ်ရာကို ထွက်ပြေးတိမ်းရှောင်နေရပြီး ကျန်ရှိနေခဲ့သည့် ၎င်းတို့၏ အိုးအိမ်၊ စည်းစိမ်များသည်လည်း လေကြောင်းနှင့် လက်နက်ကြီး ပစ်ခတ်ခြင်းတို့ကြောင့် ပျက်စီးခြင်း၊ မီးရှို့ခံရခြင်း၊ စစ်ကောင်စီတပ်၏ ယူဆောင်ခံရခြင်းများရှိကြောင်း ကရင်အရေးပေါ် ကူညီကယ်ဆယ်ရေးကော်မတီဝင်ထံက သိရသည်။
" စစ်ကောင်စီတပ်သားတွေက မနေ့ကအထိဆိုရင် ပြည်သူတွေရဲ့အိမ်ပေါ်တက်တယ်။ ပစ္စည်းတွေယူတယ်။ ကျွဲ၊ နွားတွေကို ဆွဲယူတယ်။ ပြည်သူတွေက ပြောတဲ့အခါကျတော့ ပစ်သတ်တာတွေ လုပ်တယ်။ ပြီးတော့ ရွာမီးရှို့တာတွေလည်း လုပ်တယ်" ဟု ကရင်အရေးပေါ်ကူညီကယ်ဆယ်ရေးကော်မတီ (မုန်းမြို့နယ်) မှ တာဝန်ရှိသူတစ်ဦးက ဆက်လက်ပြောဆိုသည်။
မုန်းမြို့နယ်မှ စစ်ဘေးရှောင် ဒေသခံများအတွက် ကရင်အရပ်ဘက်ကူညီကယ်ဆယ်ရေးအဖွဲ့ (KRC) က စားနပ်ရိက္ခာများ၊ ဆေးဝါးကုသမှုများကို ကူညီပေးလျက်ရှိသော်လည်း မိုးရာသီဖြစ်သည့်အလျောက် အဆိုပါ စစ်ဘေးရှောင်များအတွက် လူသားချင်းစာနာထောက်ထားမှုဆိုင်ရာ အရေးပေါ် အကူအညီများ လိုအပ်လျက်ရှိကြောင်း KNU ထံက သိရသည်။
စာတည်း။ ။အောင်ကျော်ဖြိုး
