စစ်ရှောင်နေရသည့် ရငဲရွာသား အချို့ နေအိမ်သို့ ပြန်ကာ အဝတ်အစား နှင့် အသုံးအဆောင်ပစ္စည်းယူစဉ် စစ်ကောင်စီတပ်က ရိုက်နှက်ကာ ဖမ်းဆီးထားကြောင်း ဒေသခံထံက သိရသည်။
တနင်္သာရီတိုင်း၊ ထားဝယ်ခရိုင်၊ သရက်ချောင်းမြို့နယ်၊ ရငဲရွာတွင် ဩဂုတ်လ ၅ ရက်နေ့ မွန်းလွှဲပိုင်းက အမျိုးသား သုံးဦးနှင့် အမျိုးသမီး နှစ်ဦး စုစုပေါင်း ငါးဦးကို ကင်းလှည့်နေသည့် စစ်ကောင်စီတပ်က ဖမ်းဆီးခဲ့ခြင်းဖြစ်ကြောင်း ဒေသခံစစ်ရှောင်များကဆိုသည်။
ရငဲရွာ ဒေသခံ စစ်ရှောင်တစ်ဦးက " မိုးတွင်းကာလဆိုတော့ အဝတ်အစားတွေ မရှိလို့ အိမ်ပြန် သွားယူ ကြတာပါ။ စစ်သားတွေက တွေ့ရှိ ဖမ်းဆီးပြီး ဒူးထောက်ခိုင်းထားတယ်။ ရိုက်နှက်ပြီးတော့ အမျိုးသမီးတွေကိုတော့ ပြန်လွတ်လိုက်တယ်"ဟု ပြောသည်။
လက်ရှိတွင် အမျိုးသမီးနှစ်ဦးကို ပြန်လွှတ်ခဲ့ပြီး အမျိုးသားသုံးဦးကိုဖမ်းဆီးထားကြောင်း သိရသည်။ ၎င်းတို့ စီးနင်းလိုက်ပါလာသည့် ဆိုင်ကယ်များကို ကားနှင့် သယ်ဆောင်သွားကြောင်း၊ ထိုအမျိုးသားသုံးဦးအား သရက်ချောင်း အခြေစိုက် ခမရ-( ၄၀၃) တပ်ရင်းသို့ ဖမ်းဆီးသွားကြောင်း ဒေသခံများထံက သိရသည်။
သရက်ချောင်းမြို့၊ ရငဲရွာရှိ မြွေတောင်ပေါ်တွင် စစ်ကောင်စီ တပ်သားများ တပ်စွဲ ထားသည်မှာ နှစ်လကျော် ရှိနေရှိပြီ ဖြစ်သည်။ ရငဲရွာ ဒေသခံများ နေအိမ်သို့ ခေတ္တ ပြန်လာစဥ် စစ်ကောင်စီက ဖမ်းဆီး ပစ်သတ်မှုများ မကြာခဏ ဖြစ်ပွားလေ့ရှိသည်။
စာတည်း။ ။အောင်ကျော်ဖြိုး