ရန်ကုန်၊ မတ် ၁၃ ။ ။ ၂၀၁၅-၂၀၁၆ခုနှစ်စာသင်နှစ်အတွက် အမှန်တကယ် လိုအပ်မှုရှိသော ကျောင်းသား (၁၉၆)ဦးကို ရွေးချယ်ကာ ရခိုင်သဟာရအသင်း (ရန်ကုန်)မှ ထောက်ပံ့ပေးခဲ့ကြောင်း ရခိုင်သဟာယအသင်းဥက္ကဋ္ဌ ဦးလှမောင်သိန်းက ပြောသည်။
ကျောင်းသားများအား ပညာသင်ဆုပေးပွဲအခမ်းအနားကို မတ် ၁၃ရက်က တာမွေရှိ ရခိုင်သဟာသအသင်းရုံးတွင် ကျင်းပခဲ့သည်။
မြန်မာနိုင်ငံရှိ ပြည်နယ်နှင့်တိုင်းအရပ်ရပ်တို့တွင် ရခိုင်ပြည်နယ်သည် ဖွံဖြိုးတိုးတက်ရေး နောက်အကျဆုံးသော ပြည်နယ်များထဲမှ တစ်ခုအဖြစ်ရပ်တည်နေသည်။ စစ်မှန်သော ဖွံဖြိုးတိုးတက်ရေးအတွက် အရေးပါအရာရောက်လျက် အခြေခံအကျဆုံး အခန်းကဏ္ဍမှာ ပညာရေးမြှင့်တင်ပေးရေးဟု ယုံကြည်လက်ခံသည့်အတွက်ကြောင့် ယခုလို ထောက်ပံ့ပေးနေခြင်းဖြစ်ကြောင်း ၎င်းက ပြောကြားခဲ့သည်။
ပညာသင်ဆုရွေးချယ်ချီးမြှင့်ပေးခြင်းဖြင့် ရခိုင်သဟာယအသင်းသည် ကျောင်းသားများကို ငွေကြေးတစ်ခုဖြင့်သာ ထောက်ပံ့ပေးနေခြင်းမဟုတ်ဘဲ အမျိုးသားရေးတာဝန် ထမ်းဆောင်လိုစိတ်ရှိသော မျိုးဆက်သစ်များ၊ မိမိတို့ပြည်နယ်နှင့်လူမျိုးအတွက် အမှန်တကယ်တန်ဖိုးရှိသော အနာဂတ်ခေါင်းဆောင်များကို ပေါ်ထွန်းလာအောင် ပြုစုပျိုးထောင်ပေးနေခြင်းဖြစ်သည်ဟု ယုံကြည်ကြောင်း ပညာသင်ထောက်ပံ့ဆုရ ကျောင်းသားများတစ်ဦးဖြစ်သော ရန်ကုန်ပညာရေးတက္ကသိုလ် နောက်ဆုံးနှစ်ကျောင်းသား မောင်ဇော်ထွန်းမှ ပြောကြားခဲ့သည်။
ရခိုင်သဟာရအသင်း (ရန်ကုန်)သည် ၁၉၆၁ခုနှစ်တွင် လူမှုအဖွဲ့အစည်းတစ်ခုအဖြစ်တည်ထောင်ခဲ့ခြင်းဖြစ်ပြီး၊ နှစ်ပေါင်း ၂၀ကြာမြင့်ပြီးနောက် ၁၉၈၁ခုနှစ်တွင် ကျောင်းသားများကို ပညာသင်ငွေကြေးထောက်ပံ့ပေးသော အစီအစဉ်ကို စတင်ခဲ့ခြင်းဖြစ်သည်။ ပညာသင်ဆုလျှောက်ထားနိုင်သော လျောက်လွှာများကို နှစ်စဉ် အောက်တိုဘာလတွင် စတင်ထုတ်ပြန်လေ့ရှိပြီး ဒီဇင်ဘာလတွင် ထောက်ပံ့ပေးမည့် ကျောင်းသားများကို နောက်ဆုံးထားရွေးချယ်လေ့ရှိကြောင်း သိရှိရသည်။
