ဖေဖော်ဝါရီ ၁၃ ၊ ရန်ကုန်။ ။ ကမ္ဘာ့ဖလားခြေစစ်ပွဲအတွက် ပြင်ဆင်မှုများပြုလုပ်နေသည့် မြန်မာ့လက်ရွေးစင်အသင်း ပဏာမလူစာရင်းမှ ဒဏ်ရာရကစားသမားများကို တစ်လအတွင်း ကြံ့ခိုင်မှု ပြန်လည်ကောင်းမွန်ရန် လေ့ကျင့်ပေးမည်ဟု လက်ရွေးစင်အသင်း ကြံ့ခိုင်ရေးနည်းပြသစ် မီရိုဆလပ် က ဆိုသည်။
အသက် ၄၀ အရွယ်ရှိ ဂျာမနီနိုင်ငံသား မီရိုဆလပ်သည် ပြီးခဲ့သည့် ဇန်နဝါရီလတွင် မြန်မာ့လက်ရွေးစင်အသင်း ကြံ့ခိုင်ရေးနည်းပြအဖြစ် ရောက်ရှိလာခဲ့သူဖြစ်ပြီး ယခင်က ဘာလင် ယူ-၁၆ ၊ ယူ-၂၀ အသင်းများတွင် ကြံ့ခိုင်ရေးမှူးအဖြစ် လုပ်ဆောင်ခဲ့ဖူးသည်။
“ မြန်မာကစားသမားတွေကို အခုဆို လေ့ကျင့်တာ နှစ်ကြိမ်ရှိပါပြီ။ ဒီထဲမှာ တချို့ကစားသမားလေးတွေက ဒဏ်ရာရအနေအထားရှိနေပါတယ်။ ကျွန်တော်တို့ တစ်ပတ်မှာ တစ်ရက်လေ့ကျင့်တယ်။ နောက်နေ့မနက်မှာ ကြံ့ခိုင်မှုအတွက် Gym ကစားခိုင်းပါတယ်။ လောလောဆယ်တော့ သူတို့ ဒဏ်ရာကို စောင့်ကြည့်နေတုန်းပါပဲ။ အသင်းနဲ့ ပူးပေါင်းလေ့ကျင့်မခိုင်းပဲ အပေါ့စားလေ့ကျင့်ခန်းပဲ လုပ်ခိုင်းထားပါတယ်။ ဒီလိုပုံမှန်လေ့ကျင့်မှု များများလုပ်ပေးရင်းနဲ့ တစ်လ၊ နှစ်လလောက်အတွင်း ဒီကစားသမားတွေ ကြံ့ခိုင်မှုပြန်ကောင်းအောင် လုပ်ဆောင်ပေးသွားပါ့မယ် ” ဟု မီရိုဆလပ်က ဒဏ်ရာရကစားသမားအချို့၏ အခြေအနေနှင့် ပတ်သက်ပြီး ပြောသည်။
စင်ကာပူနှင့်ခြေစမ်းပွဲ၊ လက်ဘနွန်နှင့်ကစားရမည့် ကမ္ဘာ့ဖလားခြေစစ်ပွဲစဉ်များအတွက် ရွေးချယ်ထားသော ပဏာမမြန်မာ့လက်ရွေးစင်အသင်းလူစာရင်းတွင် ငြိမ်းချမ်းအောင်၊ ကြည်လင်း၊ ကျော်မင်းဦး၊ ဒေးဗစ်ထန်းစသည့် ကစားသမားများဒဏ်ရာရနေသည်။ မြန်မာ့လက်ရွေးစင်အသင်းကို လက်ရှိအချိန်တွင် တစ်ပတ်၊ တစ်ရက်နှုန်းဖြင့်လေ့ကျင့်မှုများပြုလုပ်နေပြီး မတ်လ ၁၄ ရက်တွင် စခန်းသွင်းလေ့ကျင့် မည်ဖြစ်သည်။
