ဇူလိုင် ၂၇
ရခိုင်ပြည်နယ် သံတွဲမြို့ပေါ်ရပ်ကွက်တွေမှာ ဒီကနေ့ မနက်ပိုင်းစတင်ပြီး ရေတွေဝင်ရောက်လာကာ နစ်မြှုပ်လုနီးပါး ဖြစ်လာတဲ့အတွက် ရပ်ကွက်နေဒေသခံတွေဟာ ဘေးလွတ်ရာကို ထွက်ပြေးတိမ်းရှောင် နေကြရသလို အရေးပေါ် ကူညီကယ်ဆယ်ရေးတွေလည်း လိုအပ်နေတယ်လို့ သိရပါတယ်။
သံတွဲမြို့မဈေးနား၊ ဘုရင့်နောင်လမ်း၊ ရတနာလမ်းနဲ့ မာဃလမ်းတွေမှာ ရေတွေပြည့်လျှံနေတာဖြစ်ပြီး အနိမ့်ပိုင်းရပ်ကွက်တွေဖြစ်တဲ့ ထန်းပင်ကုန်း၊ ဗောဓိကုန်း၊ ရွာသစ်ကုန်းနဲ့ စံပယ်လမ်းတွေမှာလည်း ရေနစ်မြှုပ်နေတယ်လို့ သိရပါတယ်။
ဓာတ်ပုံ- (သံတွဲမြို့ ဖေစ့်ဘွတ်)
သံတွဲမြို့ တချို့ရပ်ကွက်တွေမှာ လူအရပ် ရင်ဘတ်လောက်အထိ ရေနစ်မြှုပ်နေပြီး ရေစီးအလွန်ပြင်း ထန်နေတယ်လို့ သံတွဲဒေသခံတွေက လူမှုကွန်မှာ အသိပေးရေးသားထားကြပါတယ်။
သံတွဲ- ဂွမြို့ အဝေးပြေးကားလမ်းမကြီးပေါ်မှာလည်း ရေတွေပြည့်လျှံနေတဲ့အတွက် ဒေသခံတွေက စက်တပ်လှေတွေနဲ့ သွားလာနေကြတာကို တွေ့ရပါတယ်။
သံတွဲမြို့မှာ ပြီးခဲ့တဲ့ ၂၀၀၄ ခုနှစ်က ဆည်ကျိုးလို့ ရေးကြီးရေလျှံမှု ဖြစ်ပေါ်ပြီးနောက် ဆယ်စုနှစ်တစ်ခုအကြာ မကြုံစဖူး မြို့ပေါ်ရပ်ကွက် အားလုံးနီးပါး ထပ်မံရေကြီးမှုနဲ့ ကြုံနေကြရတာလည်း ဖြစ်ပါတယ်။