စစ်အုပ်စုက အောက်ခြေအုပ်ချုပ်ရေးယန္တရားတွေ စတင်နိုင်ဖို့ ထွေအုပ်ရုံးတွေ ပြန်ဖွင့်ဖို့ ကြိုးစားပေမယ့် ထင်တိုင်းမပေါက်ခဲ့ပါဘူး။ လူထုက စစ်အုပ်စုလက်အောက် အလုပ်လုပ်မယ့် အုပ်ချုပ်ရေးမှူးမှန်သမျှကို လက်မခံကြောင်း ပြသတဲ့အနေနဲ့ ရုံးတွေကို သော့ခတ် ပစ်တာ၊ ရုံးလာဖွင့်ရင် ဆန္ဒပြတာတွေ လုပ်ခဲ့ပါတယ်။ ဒါပေမဲ့လည်း စစ်အုပ်စုဘက်က လက်နက်ကိုင်လုံခြုံရေးတွေနဲ့ ရုံးဖွင့်ဖို့ ကြိုးစား ခဲ့သလို ရုံးထိုင်မယ့်သူမရှိရင် စစ်တပ်က ရုံးထိုင်မယ်လို့ ကြေညာတာတွေ လုပ်ခဲ့ပါတယ်။ ဒီ့နောက်ပိုင်း ထွေအုပ်ရုံးတွေအပြင် စစ်အုပ်စုခန့် အုပ်ချုပ်ရေးမှူးတွေ ကံဆိုးမိုးမှောင် ကျလာပါတော့တယ်။