စက်တင်ဘာ ၂ ။ ။ ဥဇဘက်ကစ္စတန် သမ္မတ အစ္စလမ်ကာရီမော့ဗ်၏ ကျန်းမာရေးအခြေအနေ ဆိုးရွားနေပြီး စိုးရိမ်ရသည့် အခြေအနေရှိသည်ဟု ၎င်း၏ အစိုးရအဖွဲ့က စက်တင်ဘာ ၂ ရက်တွင် ထုတ်ပြန်သွားသည်။
ယခုအခါ ဗဟိုအာရှ၏ လူဦးရေအထူထပ်ဆုံး နိုင်ငံတွင် လွတ်လပ်ရေးရပြီးနောက်ပိုင်း ပထမဆုံးအကြိမ် အာဏာလွှဲပြောင်းမှုတစ်ရပ် ဖြစ်လာစရာ ရှိနေသည်ဟု မျှော်လင့်ရသည်။
အသက် ၇၈ နှစ်ရှိပြီဖြစ်သော သမ္မတ ကာရီမော့ဗ်သည် ပြီးခဲ့သည့် ၂၄ နာရီအတွင်းက အခြေအနေအတော်ဆိုးရွားခဲ့သည်ဟု ဝန်ကြီးအဖွဲ့က ထုတ်ပြန်ထားသည်။
" ဆရာဝန်တွေက အခြေအနေက အရေးပေါ်အခြေအနေရောက်နေပြီလို့ ပြောထားပါတယ်" ဟု ဝန်ကြီးအဖွဲ့က ထုတ်ပြန်သည်။ ကာရီမော့ဗ်သည် ပြီးခဲ့သည့် သြဂုတ် ၂၇ ရက်ကတည်းက လေသင်တုန်းဖြတ်သည့် ဝေဒနာဖြင့် ဆေးရုံတက်နေခဲ့ရခြင်းဖြစ်သည်။
ရွှေနှင့် သဘာဝဓါတ်ငွေ့ ပေါကြွယ်ဝပြီး ဝါဂွန်း အဓိကတင်ပို့သူနိုင်ငံဖြစ်သည့် ဥဇဘက်ကစ္စတန် နိုင်ငံတွင် သမ္မတ ကာရီမော့ဗ်မှာ ၁၉၈၉ ခုနှစ်ကတည်းက အာဏာရှင်ဆန်ဆန်ဖြင့် အုပ်ချုပ်နေခဲ့ခြင်း ဖြစ်သည်။
