မန္တလေးတိုင်း၊ မြင်းခြံခရိုင်မှာ မြိုင်မြိုင်ဆိုင်ဆိုင် သုံးခရိုင်စစ်ဆင်ရေးကို နိုဝင်ဘာလ ၁၆ ရက်နေ့က စတင်ခဲ့ပြီး မြင်းခြံမြို့နယ် ကိုင်းရွာ(ရန္တပို) စစ်ကောင်စီတပ်စခန်းကို ပြည်သူ့ကာကွယ်ရေးတပ်ဖွဲ့တွေက သိမ်းပိုက်နိုင်ခဲ့ပါတယ်။ 

မြင်းခြံမြို့နယ် ကိုင်းရွာ(ရန္တပို) စစ်ကောင်စီတပ်စခန်းကို ပူးပေါင်းတပ်တွေနဲ့ နိုဝင်ဘာလ ၁၆ ရက်နေ့ မနက် ၅ နာရီခွဲဝန်းကျင် အချိန်ခန့်မှာ တိုက်ခိုက်သိမ်းပိုက်နိုင်ခဲ့တယ်လို့ ဦးဆောင်တိုက်ခိုက်ခဲ့တဲ့ မြင်းခြံခရိုင် တပ်ရင်း(၂) ယာယီတပ်ရင်းမှူးက မဇ္ဈိမကိုပြောပါတယ်။

ကိုင်းရွာကို စစ်ကူသွားဖို့ပြင်ဆင်နေတဲ့ မြင်းခြံမြို့နယ် ဧရာဝတီမြစ်ကြောင်း ဆီမီးခုံ ရေနက်ဆိပ်ကမ်းက စစ်ကောင်စီသင်္ဘောတွေကို ဒရုန်းနဲ့  တိုက်ခိုက်ခဲ့ပြီး စစ်ကောင်စီတပ်ဘက်က ၁၀ ဦးထက်မနည်းသေဆုံးနိုင်တယ်လို့ မြောင်မြို့နယ်ပြည်သူ့ကာကွယ်ရေးနှင့်လုံခြုံရေးအဖွဲ့တာဝန်ခံ ကပြောပါတယ်။

မြင်းခြံမြို့နယ် ကိုင်းရွာ စစ်ကောင်စီတပ်စခန်း သိမ်းပိုက်မှုကို မြင်းခြံခရိုင် တပ်ရင်း(၁)  တပ်ရင်း (၂) တပ်ရင်း(၃) ၊ ညောင်ဦး မြင်းခြံခရိုင် ပကဖအဖွဲ့တွေ မြင်းခြံခရိုင်က Local PDF တပ်ရင်းတပ်ဖွဲ့တွေ မြောင်မြို့နယ်က တပ်ပေါင်းစု  CDSOM ဒရုန်းတပ်ဖွဲ့ စတဲ့ ပြည်သူ့ကာကွယ်ရေး ပကဖ ပလဖ အဖွဲ့ ၁၆ ဖွဲ့က ပါဝင်တိုက်ခိုက်ခဲ့ကြတယ်လို့ သိရပါတယ်။

တင်ဆက်၊တည်းဖြတ် - KMN