ကရင်အမျိုးသားအစည်းအရုံး (KNU) တပ်မဟာ (၆) နယ်မြေ၊ ဒူးပလာယာခရိုင်အတွင်း အဓိက စစ်ရေးလှုပ်ရှားနေသည့် ကျားဖြူစစ်ကြောင်းက ၎င်းတို့၏ စစ်ပညာသင်တန်း အပတ်စဥ် (၃) သင်တန်းဆင်းပွဲ ကျင်းပပြုလုပ်ခဲ့ကြောင်း ယနေ့ နိုဝင်ဘာလ ၁၁ ရက်နေ့တွင် သတင်းထုတ်ပြန်သည်။
အပတ်စဉ် (၃) မုန်တိုင်းအပတ်စဉ်ဟု အမည်ပေးထားသည့် စစ်ပညာသင်တန်း၏ သင်တန်းဆင်းပွဲအား နိုဝင်ဘာလ ၉ ရက်နေ့က ကျင်းပပြုလုပ်ခဲ့ခြင်းဖြစ်ပြီး သင်တန်းဆင်းရဲဘော်များသည် ကျားဖြူစစ်ကြောင်း လုံခြုံရေးတပ်ခွဲ ( Southern Eagle PDF )၊ ကျားဖြူတပ်ခွဲ (၄)၊ ကျားဖြူတပ်ခွဲ (၅) (Justice Solider PDF) တို့တွင် တာဝန်ထမ်းဆောင်ကြမည်ဖြစ်ကြောင်း သိရသည်။
" ရဲဘော်တွေရဲ့ စိတ်အားထက်သန်မှုကတော့ မပြောပြနိုင်အောင်ပါဘဲ၊ သင်တန်းမပြီးသေးဘူး ရှေ့တန်းကိုတောင်းထွက်နေလို့ ကျနော်တို့နားလည်အောင်မနည်းပြောထားရပါတယ်" ဟု ကျားဖြူတပ်ခွဲ (၄) ပြန်ကြားရေးတာဝန်ခံက မဇ္ဈိမကိုပြောသည်။
သင်တန်းကာလနှင့် သင်တန်းသား အရေအတွက်၊ သင်တန်းကာလ ကြာချိန်တို့အား မေးမြန်းရာ လုံခြုံရေးအရ ဖြေကြားခြင်း မပြုခဲ့ပေ။
စာတည်း - သန့်ဇော်(သန်လျင်)
