ကရင်ပြည်နယ်၊ ကရင်အမျိုးသားအစည်းအရုံး (KNU) တပ်မဟာ(၆) ထိန်းချုပ်နယ်မြေ ကော့ကရိတ်မြို့အနီးဝန်းကျင်တွင် မတ်လ၂ရက်နေ့၌ စစ်ကောင်စီတပ်နှင့် ကော်သူးလေတပ်မတော်(Lion Battalion ဗျူဟာစစ်ကြောင်း)တို့ တိုက်ပွဲဖြစ်ပွားခဲ့ပြီး ကော်သူးလေတပ်မတော်မှ သုံးဦးလက်နက်ကြီးစ ထိမှန်ခဲ့ကာ ရွာသားတစ်ဦးသေဆုံးခဲ့ကြောင်း စစ်ရေးသတင်းအရင်းအမြစ်များထံမှ သိရသည်။
ကော့ကရိတ်မြို့အနီးတွင် Lion Battalion ဗျူဟာစစ်ကြောင်းတို့ လိုက်ပါလာသည့် ကားကို ကမိုင်ကုန်းကျေးရွာအနီးရှိ စစ်တပ်မှ လက်နက်ကြီးဖြင့်စတင်ပစ်ခတ်ခဲ့ပြီး နှစ်ဖက်တိုက်ပွဲဖြစ်ပွားခဲ့ခြင်းဖြစ်သည်။
“နေ့လယ် ၁ နာရီ ၅၀ ကစပစ်တယ်၊ အချိန် တစ်နာရီခွဲလောက်ကြာတယ်၊ အဲ့မှာ တော်လှန်ရေးတပ်ဖွဲ့ထဲက တစ်ယောက်လက်နက်ကြီးထိတယ်၊ ည ၈နာရီလောက်မှာ တော်လှန်ရေးတပ်ဖွဲ့ဝင်တွေ ရှိနိုင်တဲ့နေရာတွေကို စစ်တပ်က ရမ်းပြီးလက်နက်ကြီးတွေနဲ့ပစ်တာ ကမိုင်ကုန်း၊ ခလရ(၉၇)တပ်ရင်း၊လှိုင်ဝ အဲ့နေရာတွေကနေ ၈၁ မမ၊ ၁၂၀မ မ ဟောက်ဝစ်ဇာတွေနဲ့ကိုပစ်တာ၊ တစ်နေ့ကုန်ဆိုရင် အချက်ရေ ၁၅၀ လောက်ကိုပစ်တာဗျ၊ ရွာသားတစ်ယောက်သေတယ်၊ လက်ကို တစ်ယောက်ထိတယ်”ဟု ဒေသခံတစ်ဦးမှပြောသည်။
ထို့အပြင် စစ်ကောင်စီတပ်၏ လက်နက်ကြီးရမ်းသန်းပစ်ခတ်မှုကြောင့် ကျေးရွာနေအိမ်များပျက်စီးခဲ့ပြီး နွား သုံးကောင်သေကာ ငါးကောင်ဒဏ်ရာရရှိခဲ့ကြောင်းသိရသည်။ ကော့ကရိတ်မြို့အနီးဝန်ကျင်ကျေးရွာအချို့ကို တော်လှန်ရေးအင်အားစုများက ထိန်းချုပ်ထားနိုင်ခဲ့ပြီး ခလရ(၉၇)တပ်ရင်းမှ နေ့စဉ်ဆိုသလို လက်နက်ကြီးများဖြင့် ရမ်းသန်းပစ်ခတ်မှုများ ရှိနေသည်။
စာတည်း - သန့်ဇော်(သန်လျင်)
