စစ်တပ် အာဏာသိမ်းသည့် ၂၀၂၁ ခုနှစ် ဖေဖော်ဝါရီလ ၁ ရက် နောက်ပိုင်းမှ စ၍ မြန်မာနိုင်ငံရှိ LGBTIQ များသည် စစ်အာဏာရှင် ဆန့်ကျင် ဖြုတ်ချရေး သပိတ်စစ်ကြောင်းများတွင် ပါဝင် ခဲ့ကြသည်။
ထို့ပြင် လက်နက်ကိုင် တော်လှန်ရေး နည်းလမ်းဖြင့် ခုခံကာကွယ်စစ် စတင်ချိန်တွင်လည်း တိုင်းရင်းသား လက်နက်ကိုင်များ ရှိရာ လွတ်မြောက်နယ်မြေများ၌ ခိုလှုံကာ တိုက်ပွဲ ဝင်သူများလည်း ရှိသည်။
အကြမ်းဖက် စစ်ကောင်စီတပ်၏ လက်ချက်ကြောင့် မြန်မာနိုင်ငံ တစ်နိုင်ငံလုံးတွင် LGBTIQ ၁၇ ဦးခန့် အနည်းဆုံး သေဆုံးခဲ့ရပြီး နှစ်ဦး ပြင်းထန်စွာ ဒဏ်ရာ ရရှိခဲ့သည်။ LGBTIQ ပေါင်း ၈၅ ဦးထက် မနည်း မတရား ဖမ်းဆီးထိမ်းသိမ်း ခံခဲ့ရပြီး အယောက် ၅၀ မှာ ဖမ်းဝရမ်းကြောင့် တိမ်းရှောင် နေရဆဲ ဖြစ်သည်။
နွေဦးတော်လှန်ရေးတွင် ပါဝင်လှုပ်ရှားကာ လက်ရှိအချိန်အထိ မြေပြင်သပိတ်များကို ဦးဆောင် လှုပ်ရှားနေသည့် LGBT Community Yangon အဖွဲ့ဝင် အမ်န်သျှားစစ်ဇော်ကို နွေဦးတော်လှန်ရေး ထဲက LGBTIQ များ၏ အကြောင်း ဆက်သွယ် မေးမြန်းထားသည်။
