နေပြည်တော်။ ။ ပြီးခဲ့သည့် နိုဝင်ဘာ ၈ ရက်က ကျင်းပခဲ့သည့် အထွေထွေရွေးရွေးကောက်ပွဲတွင် ထွက်ပေါ်လာသည့် အရှုံးရလာဒ်ကြောင့် ကိုယ်တိုင်မျက်ရည်ကျခဲ့ရသည်ဟု ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီကိုယ်စားပြုကာ မွေးရပ်ဇာတိဖြူးမြို့နယ်တွင် ရွေးကောက်ပွဲဝင်ပြိုင်ခဲ့သော ပြည်ထောင်စုလွှတ်တော်နာယက သူရဦးရွှေမန်းက ပြောဆို လိုက်သည်။
“အကြောင်းအမျိုးမျိုးကြောင့်ရှုံးသွားတယ် စိတ်မကောင်းပါဘူး တစ်ယောက်တည်းမဟုတ်ပါဘူး၊ မိသားစု၊ ပြီးတဲ့အခါမှာ တကယ့် ဒို့အပေါ်နားလည်စေတနာထားတဲ့သူတွေ စိတ်မကောင်းကြဘူး၊ တစ်ချို့လည်း ငိုကြတယ်၊ အဲ့ဒီမှာခင်ဗျားကော မပါဘူးလား။ ဒို့လည်း ငိုတယ် ၊ ဒို့မိန်းမလည်းငိုတယ် ကိုယ့်ပတ်ဝန်းကျင်ကလည်း ငိုတယ်၊ ဒါပေမယ့် ငိုပြီးတဲ့အခါကျတော့ အေး..ဒါက ပြည်သူတွေအဆုံးအဖြတ်ပဲ၊ ဒါခံယူရမှာပေါ့၊ အဲ့တော့ ပြည်သူက သူတို့ နိုင်ပေးစေချင်တဲ့သူ နိုင်သွားပြီ။ ဒါကြောင့်မို့လို့ကိုယ်လည်း ပြည်သူထဲကပြည်သူတစ်ယောက်ဖြစ်တဲ့အတွက် ကိုယ်လဲအနိုင်ရတဲ့အထဲမှာပါတယ်ဆိုတဲ့အနေအထားနဲ့ဒီခံယူချက်နဲ့ဆက်လုပ်တယ်” ဟု ပြည်ထောင်စုလွှတ်တော် နာယက သူရဦးရွှေမန်းက ပြောသည်။
ပြည်ထောင်စုလွှတ်တော်နာယက သူရဦးရွှေမန်းသည် နေပြည်တော်၊ ဇေယျာသီရိမြို့နယ်ရှိ မြို့နယ်စီမံခန့်ခွဲမှုကော်မတီ၊ စည်ပင်သာယာရေးကော်မတီ၊ မြို့နယ်အဆင့် ဌာနဆိုင်ရာများ၊ မြို့နယ်/ရပ်ကွက်/ကျေးရွာအုပ်စု ဖွံ့ဖြိုးတိုးတက်ရေးအထောက်အကူပြု ဥက္ကဌများနှင့် ရပ်/ကျေးအုပ်ချုပ်ရေးမှူးများ ဒီဇင်ဘာ ၁၁ရက်၊ ညနေ ၅နာရီတွင် ဇေယျာသီရိမြို့နယ်ရှိ အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမတွင် တွေ့ဆုံစဉ် ထိုသို့ ပြောကြားခဲ့ခြင်း ဖြစ်သည်။
သူရဦးရွှေမန်းသည် ၂၀၁၀ရွေးကောက်ပွဲတွင် နေပြည်တော်၊ ဇေယျသီရိမြို့နယ်မှ အနိုင်ရရှိခဲ့သူဖြစ်သည်။ လက်ရှိ ၂၀၁၅ရွေးကောက်ပွဲတွင် ရှုံးနိမ့်သွားသူ သူရဦးရွှေမန်းသည် ပါတီတစ်ခုတည်းဖြင့် အစိုးရဖွဲ့စည်းခွင့်ရရှိကာ သောင်ပြို၊ ကမ်းပြို အနိုင်ရသွားသည့် အမျိုးသားဒီမိုကရေစီအဖွဲ့ချုပ်ဥက္ကဌ ဒေါ်အောင်ဆန်းစုကြည်နှင့် အကြိမ်ရေအများဆုံး တွေ့ဆုံနေသူတစ်ဦးဖြစ်သည်။
