ကချင်ပြည်နယ် အခြေစိုက် မြစ်ကြီးနား သတင်းဂျာနယ်မှ သတင်းထောက် နှစ်ဦးကို သခင်စစ် သတ္ထုတူးဖော်ရေး ကုမ္ပဏီက ဝိုင်းမော်မြို့နယ်တွင် ယနေ့ ခေါ်ယူတွေ့ဆုံကာ နှိပ်စက်ညှဉ်းပန်းပြီး ယာယီ ချုပ်နှောင်ခဲ့ကြောင်း ဂျာနယ်မှ အမှုဆောင်အရာရှိချုပ် ဦးဘရန်မိုင်က ပြောသည်။
အသက် ၂၀ ကျော် အရွယ် လူငယ်များဖြစ်သော မမွန်းမွန်းပန်၊ ကိုအားကျယ်တို့ကို ရဲတပ်ဖွဲ့ အကူအညီဖြင့် သွားရောက် ကယ်ထုတ်နိုင်ခဲ့ကြောင်း၊ နှိပ်စက်ဖမ်းဆီးမှုအတွက် ရဲစခန်းတွင် အမှုဖွင့်မည် ဖြစ်ကြောင်း ၎င်းက ပြောသည်။
“မိန်းကလေးကို တစ်ခန်းမှာ ချုပ်ထားတယ်။ ယောက်ကျားလေးကို တစ်ခန်းမှာ ချုပ်ထားတယ်။ ကျွန်တော်တို့ကို တစ်ယောက်က ဖုန်းဆက်ပြီး ပြောတယ်” ဟု ၎င်းက ပြောသည်။
ထိုသို့ ရိုက်နှက်ဖမ်းဆီးမှုသည် ဖေဖော်ဝါရီ ၂၅ ရက်နေ့ထုတ် မြစ်ကြီးနားဂျာနယ်တွင် မွန်းမွန်းပန် ရေးသားသည့် “မန်ဒေါင် ကျေးရွာအုပ်စုတွင် တရုတ် တစ်သျူးငှက်ပျော စိုက်ပျိုးသည့် ကုမ္ပဏီနှစ်ခု ဝင်ရောက် လုပ်ကိုင်နေ” ဆိုသည့် သတင်းနှင့် ဆက်နွယ်မည်ဟု ယူဆရကြောင်း ၎င်းက ပြောသည်။
သတင်းနှင့် ပတ်သက်ပြီး ကုမ္ပဏီ တာဝန်ရှိသူများက သတင်းထောက်နှစ်ဦးကို ယနေ့ နံနက်ပိုင်းတွင် မြစ်ကြီးနားမြို့ တစ်ဘက်ကမ်းရှိ ဝိုင်းမော်မြို့နယ်သို့ ခေါ်ယူတွေ့ဆုံပြီးနောက် ဤဖြစ်ရပ် ပေါ်ပေါက်လာခြင်း ဖြစ်သည်ဟု ၎င်းက ပြောသည်။
နံနက် ၁၁ နာရီခွဲတွင် ကယ်ထုတ်နိုင်ခဲ့ကြောင်း၊ အမျိုးသမီးသတင်းထောက် ပါးရိုက်ခံရကြောင်း၊ အမျိုးသားသတင်းထောက် ထိုင်ထ အကြိမ်များစွာ လုပ်ခဲ့ရကြောင်း ၎င်းက ဆက်ပြော သည်။
မြစ်ကြီးနားဂျာနယ်၏ facebook စာမျက်နှာတွင်လည်း ဖော်ပြထားသော အဆိုပါသတင်းကို ဖြုတ်ချပေးသည်အထိ ထိုင်ထလုပ်ရမည်ဟု ဖမ်းဆီးချုပ်နှောင်သူတို့က သတင်းထောက်ကို ပြောဆိုခဲ့သည်ဟု သိရသည်။
ထိုင်ထ အကြိမ် ၃ဝဝ ခန့် လုပ်ခဲ့ရသည်ဟု ဆိုသည်။
ဤဖြစ်ရပ်နှင့် ပတ်သက်ပြီး ကချင်ပြည်နယ်ရှိ သခင်စစ်ကုမ္ပဏီအား ဆက်သွယ်မေးမြန်းနိုင်သည့် တယ်လီဖုန်းနံပတ်ကို မရရှိသေးပေ။
မြစ်ကြီးနားဂျာနယ်သည် အပတ်စဉ်ထုတ် သတင်းဂျာနယ် ဖြစ်သည်။
တရုတ်နိုင်ငံမှ လုပ်ငန်းရှင်တို့ ကချင်ပြည်နယ်တွင် တစ်ရှူးငှက်ပျောစိုက်ပျိုးရေးလုပ်ငန်း လုပ်ကိုင်နေကြကြောင်း၊ အများအပြားမှာ တရားမဝင် စိုက်ပျိုးနေခြင်းဖြစ်ကြောင်း၊ ဒေသတွင်း သဘာဝပတ်ဝန်းကျင်ပျက်စီးပြီး ဒေသခံတို့ နစ်နာနေရကြောင်း ဝိုင်းမော်မြို့နယ် ပြည်သူ့လွှတ်တော် ကိုယ်စားလှယ် ဦးလဂမ်ဇယ်ဂျုံးက သတင်းဌာနများကို ပြောခဲ့ဖူးသည်။
