ဖေဖော်ဝါရီ ၁၂ ။ ။ မကွေးတိုင်းဒေသကြီး၊ မကွေးမြို့၊ တောင်တွင်းလမ်းနှင့် အဝေရာလမ်းဆုံ၌ မီးပွိုင့်မိနေသည့်ဆိုင်ကယ်တစ်စီးအား ကားတစ်စီးမှ ဝင်တိုက်၍မောင်းပြေးသွားရာ တစ်ဖက်ယာဉ်ကြောရှိ ကား ၃ စီးအား ထပ်မံဝင်တိုက်မှု ဖေဖော်ဝါရီလ ၁၀ ရက်ညပိုင်းက ဖြစ်ပွားခဲ့သည်။
"မကွေးမြို့နယ် ၊ သန်းတောကုန်းကျေးရွာနေ စိုးမင်းထွန်း (၃၄) နှစ်က တောင်တွင်းလမ်းနဲ့အဝေရာလမ်းဆုံမှာ မီးပွိုင့်မိလို့ ဆိုင်ကယ်ကို ရပ်ထားတာပါ။ အဲဒီမှာ ဒေါင်းနေကျေးရွာအုပ်စု တဲကြီးကုန်းကျေးရွာနေထိုင်သူ အောင်ပြည်႕စုံ (၂၀)နှစ်က TOYOTA TOYOACE အဖြူရောင်မော်တော်ယာဉ်ကို မောင်းနှင်လာပြီး နောက်က ဝင်တိုက်မိခဲ့တာပါ" ဟု မကွေးနယ်မြေစခန်းမှ တာဝန်ရှိသူတစ်ဦးက ပြောသည်။
ဖြစ်စဉ်မှာ ဖေဖော်ဝါရီလ ၁၀ ရက်နေ့ ည ၈ နာရီ ၂၀ မိနစ်ခန့်တွင် ဖြစ်ပွားခဲ့ခြင်း ဖြစ်ပြီး အဆိုပါမော်တော်ယာဉ်သည် ဆိုင်ကယ်ကို တိုက်မိပြီး သုခိတာလမ်းသို့ ချိုးကွေ့ရာ ယာဉ်ကြောတစ်ဖက်ရှိ မျက်နှာချင်းဖြစ်သွားသော မော်တော်ယာဉ် ၃ စီးအား ဆင့်၍ ထပ်မံဝင်ရောက်တိုက်မိခဲ့ခြင်း ဖြစ်သည်။
"ဆိုင်ကယ်သမားကို နောက်ကဝင်တိုက်ပြီး အဖြူရောင်မော်တော်ယာဉ်က သုခိတာလမ်းထဲကို ဆက်မောင်းသွားခဲ့တယ်၊အဲဒီမှာ သုခိတာလမ်းထဲကို ချိုးကွေ့မောင်းနှင်စဉ်မှာပဲ သုခိတာလမ်းအတိုင်း မြောက်ဘက်ကနေ တောင်ဘက်ကို မောင်းနှင်လာတဲ့ NISSAN AD ဗင်တစ်စီး၊ TOYOTA CROWN တစ်စီးနဲ့ TOYOTA COROLA ဗင် တစ်စီးတို့ကို တစ်ဖက်ယာဉ်ကြောကို ဝင်ရောက်တိုက်မိခဲ့ပါတယ်"ဟု ၎င်း တာဝန်ရှိသူက ဆိုသည်။