ဒီဇင်ဘာ ၁၇ ။ ။ ပြီးခဲ့တဲ့ တနင်္ဂနွေနေ့ မနက်ပိုင်းမှာ အင်ဒိုနီးရှားနိုင်ငံ၊ ဆူလာဝေစီပြည်နယ် မြောက်ပိုင်းရှိ ဆိုပူတန်မီးတောင်ဟာ နှစ်ကြိမ်တိတိ ပေါက်ကွဲခဲ့တဲ့အပြင် ယခုအချိန်တွင်လည်း ဆက်လက်လောင်ကျွမ်းလျက်ရှိကြောင်း အင်ဒိုနီးရှားအာဏာပိုင်တွေက ထုတ်ပြန်ကြေညာလိုက်ပါတယ်။
ဆိုပူတန်မီးတောင်ဟာ ပြီးခဲ့တဲ့ တနင်္ဂနွေနေ့မနက် ၁ နာရီမထိုးခင်မှာပဲ ပြင်းထန်စွာပေါက်ကွဲ လောင်ကျွမ်းနေခဲ့တဲ့အပြင် မီးခိုးငွေ့တွေဟာ မီတာ ၇၅၀၀ (၂၄၆၀၆ ပေ) အထိမြှင့်တက်ခဲ့တာဖြစ်ပါတယ်။
ဒါအပြင် အဆိုပါမီးခိုးငွေ့တွေဟာ အရှေ့ဘက်၊ အရှေ့တောင်ဘက်နဲ့ အနောက်မြောက်ဘက်ခြမ်းကို ဦးတည်လျက်ရှိကြောင်း အာဏာပိုင်တွေက ပြောပါတယ်။
အဆိုပါမီးတောင်နဲ့ အနီးတစ်ဝိုက်မှာ နေထိုင်တဲ့ ဒေသခံတွေကိုလည်း ဘေးလွတ်ရာ ပြောင်းရွှေ့ထားတယ်လို့ သိရပါတယ်။
ဆိုပူတန်မီးတောင်ကြီးအပါအဝင် အင်ဒိုနီးရှားနိုင်ငံမှာ မီးတောင်ပေါင်း ၁၂၀ ကျော်ရှိတယ်လို့ သိရပါတယ်။
