ရန်ကုန်၊ စက်တင်ဘာ ၂၉ ။ ။ စစ်ဘေးရှောင်ပြည်သူ ၅၀၀၀ ကျော်ရှိနေသည့် မြိုင်ကြီးငူစစ်ဘေးရှောင်စခန်းတွင် စားနပ်ရိက္ခာပြတ်လပ်နေပြီဖြစ်ကြောင်း စစ်ရှောင်စခန်းအတွင်း ရေးမှူး ကိုအောင်ဝင်းထွန်းကပြောသည်။
စက်တင်ဘာ လဆန်းကတည်းက အလှူရှင်များလာရောက်မှုမရှိတော့ကြောင်း အစိုးရဘက်ကိုအကြောင်းကြားထားသော်လည်း တစ်စုံတစ်ရာ ပြန်လည်အကြောင်းပြန်ခြင်းမျိုးလည်းမရှိသေးကြောင်း ၎င်းကပြောသည်။
“ ပြန်ဖို့ဆိုတာလည်း အခြေအနေလည်းမပေး။ နေဖို့ဆိုတာလည်း အခက်ခဲအတော်များတာပေါ့။ နောက်တစ်ရက်နှစ်ရက်မှ အလှူရှင်မလာရင် ကျွန်တော်တို့ကတော့ ဘယ်လိုလုပ်ရမလဲ ပြောတော့ပြောမတတ်ဘူးပေါ့။ ဘုန်းကြီးဆန်ကယူစားရတာပေါ့ အခု “ ဟု ကိုအောင်ဝင်းထွန်းကပြောသည်။
လတ်တလောတွင် စားနပ်ရိက္ခာပြတ်တောက်နေသောကြောင့် မြိုင်ကြီးငူဆရာတော်ကြီးထံမှ ဆန်များကို ယူစားနေရကြောင်း စခန်းတာဝန်ခံ ဦးထွန်းကပြောဆိုခြင်းဖြစ်သည်။
တပ်မတော်နှင့် ကလိုထူးဘော ကရင်အစည်းအရုံး (ကေကေအို) တို့ ဖြစ်ပွားနေသည့် တိုက်ပွဲများ တစ်နှစ်နီးပါးကြာပြီးနောက် တိုးပွားလာသော စစ်ရှောင်များအတွက် စားနပ်ရိက္ခာမှာ အလှူရှင်အပေါ်၌သာ အဓိက မှီခိုနေရခြင်းလည်း ဖြစ်သည်။
မူရင်းနေရပ်ဖြစ်သည့် မဲသဝေါဒေသတွင် ယခုရက်ပိုင်းအတွင်း တပ်မတော်နှင့် ကေကေအိုအဖွဲ့တို့တိုက်ပွဲများဆက်တိုက်ဆိုသလို ပြန်ဖြစ်ပွားနေကြာင်းလည်း ဦးထွန်း ကဆိုသည်။
