စစ်ကိုင်းတိုင်း၊ ဆားလင်းကြီးမြို့နယ်၊ညောင်ပင်ကြီးရဲစခန်းမှ စစ်ကောင်စီတပ်ဖွဲ့ဝင် ခြောက်ဦးသည် ယနေ့ နံနက်ပိုင်းက ချင်းတွင်းမြစ်ဆိပ်သို့ ခြေလျင်ဆင်းလာစဉ် တိုက်ခိုက်ခဲ့ရာ လေးဦးသေဆုံးပြီး သေနတ်တလက်နှင့် ကျည်အချို့သိမ်းဆည်းရရှိခဲ့ကြောင်း ယင်းမာပင်ခရိုင်တပ်ရင်း (၂၈)၊ ဓါးမဆိုင်းတပ်မတော်က သတင်းထုတ်ပြန်သည်။
ချင်းတွင်းမြစ်ဆိပ်ကမ်းဖြစ်သည့် ထန်းတောရွာဇက်ဆိပ်သို့ ပြည်သူများထံမှ ငွေတောင်းရန် သေနတ်များကိုင်ဆောင်ပြီး အရပ်ဝတ်ဖြင့် ဆင်းလာသည့် စစ်ကောင်စီတပ်ဖွဲ့ကို ယနေ့ အောက်တိုဘာလ ၂၆ ရက်နေ့ နံနက် ၆ နာရီ ၄၅ မိနစ်တွင်အသင့်စောင့် ကြိုတိုက်ခိုက်ခဲ့ခြင်းဟု ဓါးမဆိုင်းတပ်မတော် တာဝန်ခံဗိုလ်စွမ်းသူမောင်ကပြောသည်။
" ပြည်သူတွေဆီကနေ ငွေတောင်းဖို့ဆင်းလာတဲ့ ကောင်တွေကို ဝါးတရိုက်အကွာကနေပစ်တာ လေးဦးသေတယ်။G-3တလက်နဲ့ကျည် ခုနစ်တောင့် သိမ်းဆည်းရမိတယ်"ဟု ဗိုလ်စွမ်းသူမောင်ကပြောသည်။
တိုက်ခိုက်ခဲ့သည့် နေရာသည် စစ်ကောင်စီတပ်ဖွဲ့ ဝင်များတပ်စွဲထားသည့် ညောင်ပင်ကြီးရဲစခန်း နှင့် မီ တာ ၁၀၀ ခန့်(ပေ ၃၀၀ခန့်)သာကွာဝေးသည့် အတွက် အလျင်အမြန်တိုက်ခိုက်ပြီးပြန်လည်ဆုတ်ခွာခဲ့သည်ဟုဓါးမဆိုင်းတပ်မတော်၊အထူးတိုက်ခိုက်ရေးအဖွဲ့ ခေါင်းဆောင် ဗိုလ်ထွဋ်ခေါင်က ပြောသည်။
" လေးဦးသေတယ်။ နှစ်ဦးကျန်ပြီး ပြန်ပစ်နေလို့ သေနတ် တလက်ပဲ ကောက်ခဲ့ရတယ်။ အခုလိုလုပ်နိုင်ဖို့ ၁၅ ရက်လောက် ချောင်းခဲ့ရတာ။ ဒီနေ့မှ ပဲ တိုက်ခိုက်နိုင်ခဲ့တာ။ ၅ မိနစ်လောက်အတွင်းမှာ အပြီး တိုက်ခဲ့တာ “ ဟု ဗိုလ်ထွဋ်ခေါင်က ပြောသည်။
စစ်ကောင်စီဘက်မှ ထိခိုက်သေဆုံးမှုကို မဇ္ဈိမအနေဖြင့် သီးခြားအတည်မပြုနိုင်သေးပေ။တိုက်ခိုက်ခံရပြီးနောက် စစ်ကောင်စီတပ်ဖွဲ့သည် ညောင်ပင်ကြီးကျေးရွာနှင့်ထန်းတောကျေးရွာကို နံနက် ၇ နာရီ ၄၅ မိနစ်မှစ၍ မီးရှို့ဖျက်ဆီးနေကြောင်း သိရသည်။
ညောင်ပင်ကြီး ရဲစခန်းသည် စစ်ကောင်စီနှင့် ရဲတပ်ဖွဲ့ဝင်များ ပူးပေါင်းတပ်စွဲထားသည့်နေရာဖြစ်ပြီး
ပြီးခဲ့သည့် ဇွန်လ ၉ ရက်နေ့ ညတွင် ဒေသကာကွယ်ရေးတပ်ဖွဲ့များက စီးနင်းတိုက်ခိုက်ခဲ့သည်။ ထိုတိုက်ပွဲ၌ စစ်ကောင်စီတပ်ဖွဲ့ ဝင် ၁၀ ဦး သေဆုံးခဲ့ပြီး လက်နက်ခဲယမ်းများ သိမ်းဆည်းနိုင်ခဲ့ ကြောင်းပြည်သူ့ကာကွယ်ရေးတပ်ဖွဲ့များကသတင်းထုတ်ပြန်ခဲ့သည်။
စာတည်း - အေးချမ်း
