ဥရောပစူပါလိဂ်ပြိုင်ပွဲ (ESL)ရဲ့ တရားဝင်မှုနဲ့ ပတ်သက်လို့ ၎င်းရဲ့ နောက်ဆုံးစီရင်ချက်ကို ဥရောပတရားရေးရုံး (ECJ)က ဒီဇင်ဘာ ၂၁ ရက်မှာ ချမှတ်မှာဖြစ်ပါတယ်။
UEFA နဲ့ Fifa တို့ဟာ ခွဲထွက်သွားမယ့် လိဂ်မှာ ပူးပေါင်းပါဝင်ခဲ့တဲ့ ကလပ်တွေနဲ့ ကစားသမားတွေကို ဒဏ်ခတ်အရေးယူဖို့ ခြိမ်းခြောက်နေခြင်းဖြင့် ပြိုင်ဆိုင်မှုဥပဒေကို ချိုးဖောက်နေခဲ့ကြောင်း အဲဒီ ESL နဲ့ ၎င်းရဲ့ ကျောထောက်နောက်ခံ A22 တို့က ဆိုထားပါတယ်။
ဒါပေမယ့် ပြီးခဲ့တဲ့ ဒီဇင်ဘာလက ထုတ်ပြန်ခဲ့တဲ့ အစီရင်ခံစာမှာ ECJ က ဥရောပနဲ့ ကမ္ဘာ့ဘောလုံးအဖွဲ့ချုပ်အဖွဲ့တွေရဲ့ စည်းမျဉ်းတွေဟာ "အီးယူယှဉ်ပြိုင်မှု ဥပဒေနဲ့ ကိုက်ညီတယ်"လို့ ပြောကြားပါတယ်။
တရားသူကြီး ၁၅ ဦးပါဝင်တဲ့ ECJ ရဲ့ Grand Chamber ဆီကနေ အပြီးသတ်ဆုံးဖြတ်ချက်ရလဒ်ကို နွေဦးရာသီမှာ မျှော်လင့်ခဲ့ပေမယ့် အကောင်အထည်မပေါ်ခဲ့ပါဘူး။
ဒီဇင်ဘာလမှာ စီရင်ချက်ချခြင်းဟာ ဥရောပသမဂ္ဂဥပဒေရဲ့ အကျုံးဝင်တဲ့ အဓိပ္ပာယ်ဖွင့်ဆိုချက်ကို ဖွဲ့စည်းမယ့် တရားဝင်စီရင်ချက်တစ်ခု ရှိလာမှာဖြစ်ပါတယ်။ ထုတ်ပြန်ပြီးတာနဲ့ ၎င်းစီရင်ချက်ဟာ တရားဝင် စည်းနှောင်မှုဖြစ်လာပြီး ဥရောပသမဂ္ဂအဖွဲ့ဝင်နိုင်ငံအားလုံးအပြင် အီးယူဥပဒေနဲ့ သက်ဆိုင်တဲ့ အဖွဲ့အစည်းတွေနဲ့ လူပုဂ္ဂိုလ်တွေအားလုံးက လိုက်နာရမှာဖြစ်ပါတယ်။ အဲဒီနောက် ဒီအမှုကို စူပါလိဂ်ရဲ့အချက်အလက်တွေ သက်ဆိုင်မယ့် မက်ဒရစ်စီးပွားရေးတရားရုံးဆီ ပြန်လည်လွှဲပြောင်းပေးမှာဖြစ်ပါတယ်။
ESL အတွက် အစီအစဉ်တွေကို ၂၀၂၁ ဧပြီလမှာ ထုတ်ပြန်ကြေညာလိုက်တဲ့အခါ သူတို့ဟာ ဘောလုံးကမ္ဘာတဝန်းလုံးကို တုန်လှုပ်သွားစေခဲ့ပါတယ်။
ဒီပရောဂျက်ကို လက်မှတ်ရေးထိုးခဲ့တဲ့ ပရီးမီးယားလိဂ်အသင်း ခြောက်သင်းဖြစ်တဲ့ မန်ချက်စတာယူနိုက်တက်၊ မန်ချက်စတာစီးတီး၊ လီဗာပူးလ်၊ ချယ်လ်ဆီး၊ တော့တင်ဟမ်နဲ့ အာဆင်နယ်အသင်းတို့ဟာ ပရိသတ်တွေ၊ ဘောလုံးအဖွဲ့ချုပ်တွေနဲ့ အစိုးရတို့အကြား ဆန့်ကျင်ကန့်ကွက်မှုတွေကြောင့် သူတို့ရဲ့ ထောက်ခံမှုကို လျင်မြန်စွာ ရုပ်သိမ်းခဲ့ပါတယ်။
ဒါပေမယ့် ရီးယဲလ်မက်ဒရစ်နဲ့ ဘာစီလိုနာတို့ကတော့ ဒီအစီအစဉ်တွေကို လိုက်နေဆဲဖြစ်ပြီး ဒါကို အပြီးတိုင် မဖျက်ခဲ့ပါဘူး။
ဇူလိုင်လမှာ စတင်ပါဝင်ခဲ့တဲ့ ကနဦးကလပ် ၁၅ သင်းအနက် ၁၂ သင်းမှာ ၇၂ နာရီအတွင်း နုတ်ထွက်သွားပြီးနောက် ကျန်ရှိနေတဲ့ တတိယမြောက်အဖွဲ့ဝင်ဖြစ်တဲ့ ဂျူဗင်တပ်စ်ဟာ ဒီစီမံကိန်းမှ နုတ်ထွက်ဖို့ သူတို့ရဲ့ ရည်ရွယ်ချက်ကို အချက်ပြခဲ့ပါတယ်။
ESL အစီအစဉ်ကို ကြေညာလိုက်ပြီးနောက် ပရီးမီးယားလိဂ်ကလပ်တွေအပြင် အက်သလက်တီကိုမက်ဒရစ်၊ အင်တာမီလန်နဲ့ အေစီမီလန်တို့ကို UEFA က ဒဏ်ရိုက်ခဲ့ပေယ့်လည်း ရီးယဲလ်မက်ဒရစ်၊ ဘာစီလိုနာနဲ့ ဂျူဗင်တပ်စ်တို့ကို တရားဥပဒေအရ အရေးယူခြင်းကို ရပ်ဆိုင်းခဲ့ပါတယ်။
(BBC)
