စစ်အာဏာသိမ်းဆန့်ကျင်သူ CDM ဆရာဝန် ဒေါက်တာ ဖြိုးသီဟ၏ ပီတိအိမ်စာပေ ထုတ်ဝေခွင့် လုပ်ငန်းလိုင်စင်အား စစ်ကောင်စီမှ ပိတ်သိမ်းခဲ့ကြောင်း သိရသည်။

အဆိုပါကြေညာချက်အား စစ်ကောင်စီလက်အောက်ခံ သတင်းစာမှတဆင့် စက်တင်ဘာလ ၉ ရက်နေ့ ရက်စွဲဖြင့် ပါရှိသည်။

ထိုသို့ ထုတ်ဝေခွင့်လုပ်ငန်း အသိအမှတ်ပြုလက်မှတ် ရုတ်သိမ်းကြောင်းကြေညာချက်နှင့်ပတ်သက်၍ ဒေါက်တာဖြိုးသီဟ က ယခုလိုပြောသည်။

"အဓိကက​ ကျ​နော့်လုပ်ငန်း ဖြစ်​နေလို့ ပိတ်လိုက်တဲ့ သ​ဘောပါပဲ။ စာအုပ်​တွေက​ နိုင်ငံ​ရေးအ​ကြောင်း ဘာဆိုဘာမှ မပါပါဘူး။ စိတ်ပိုင်းဆိုင်ရာနဲ့ ပတ်သက်တာ၊ ဗုဒ္ဓအဆုံးအမနဲ့ ပတ်သက်တာ​တွေပဲ ​ရေးထားတာကို ပိတ်လိုက်တာပါ။" ဟူ၍ ဖြစ်သည်။

ပီတိအိမ်စာပေ(စာအုပ်တိုက်)အား ၂၀၂၀ ခုနှစ် ဩဂုတ်လက တည်ထောင်ခဲ့ကြောင်း သိရပြီး အဆိုပါစာအုပ်တိုက်မှ စာအုပ် သုံးအုပ်သာ ထုတ်ထားရသေးကြောင်း ဆိုသည်။

စစ်ကောင်စီ၏ ယခုလိုလုပ်ရပ်နှင့်ပတ်သက်၍ ဒေါက်တာ ဖြိုးသီဟက ယခုလိုမှတ်ချက်ပြုသည်။

"​တော်လှန်​ရေး အချိန်ကြာလာတာနဲ့အမျှ၊ သူတို့ အုပ်ချုပ်လို့ ရလာတာနဲ့အမျှ တဖြည်းဖြည်း အကုန်လုံးကို ပိတ်ပင်​တော့မှာပါ။ ​နောက်ထပ် ​နောက်ထပ် စာအုပ်တိုက်​တွေ၊ စာ​ရေးသူ​တွေ၊ စာအုပ်​တွေပါ ထိလာပါလိမ့်မယ်။ ကျ​နော့်တယောက်တည်းရဲ့ ပြဿနာဆိုတာထက် ပြည်သူ​တွေ မျက်စိပိတ် နားပိတ် ဖြစ်ကုန်မဲ့လုပ်ရပ် ဖြစ်ပါတယ်။ ဒါ​ကြောင့် လွတ်လပ်ခွင့်​တွေ မဆုံးရှုံး​စေရဖို့ကို အားလုံးဝိုင်းဝန်း ကြိုးစားကြ​စေချင်ပါတယ်။" ဟု ပြောသည်။

စစ်ကောင်စီက ပီတိအိမ်စာပေအား စက်တင်ဘာလ ၈ ရက်နေ့တွင် ရုတ်သိမ်းခဲ့ခြင်းဖြစ်ပြီး ဒေါက်တာ ဖြိုးသီဟအနေဖြင့်လည်း ၎င်းရင်ဆိုင်နေရသည်ထက် ဆိုးရွားသည့်အခြေအနေရင်ဆိုင်နေရသူ အများကြီးရှိသည့်အတွက် ယခုကိစ္စအား ညည်းတွားလိုခြင်းမရှိဘဲ တော်လှန်ရေးတွင်တတ်နိုင်သည့်နေရာကသာ ဆက်လက်ပါဝင်သွားမည်ဖြစ်ကြောင်း ပြောသည်။

စာတည်း- သန့်ဇော်(သန်လျင်)