မကြာသေးခင်က တိုက်ပွဲများကြောင့် မြန်မာနိုင်ငံသား ၉,၀၀၀ ကျော်ထက်မနည်းသည် နယ်စပ်ဖြတ်ကျော်ကာ ထိုင်းနိုင်ငံ မြောက်ပိုင်း မယ်ဟောင်ဆန်ပြည်နယ်တွင် ခိုလှုံနေရလျက် ရှိနေချိန် ပြီးခဲ့သည့်ရက်၌ ကရင်နီပြည်နယ်တွင် လက်နက်ကိုင်တိုက်ပွဲများ ဆက်လက်ဖြစ်ပွားသည်။

မယ်ဟောင်ဆန်ပြည်နယ် နယ်စပ်၌ စစ်ဆင်နေသော ကရင်နီတပ်တော်( KA )မှ တိုက်ခိုက်ရေးသမားများနှင့် မြန်မာစစ်တပ်မှ တပ်ဖွဲ့ဝင်တို့ကြား ယမန်နေ့က တိုက်ပွဲများ ဖြစ်ပွားသည်ဟု KA အဆင့်မြင့် သတင်းရင်းမြစ်အရ သိရသည်။

မယ်ဟောင်ဆန်ပြည်နယ်၏ တစ်ဖက်ခြမ်း ထိုင်း-မြန်မာနယ်စပ်မှ ငါးကီလိုမီတာ အကွာခန့်ရှိ စစ်အခြေစိုက်စခန်းများသို့ မြန်မာစစ်တပ်က စစ်ကူဖြည့်တင်းသည့်နောက်၌ တိုက်ပွဲများ ဖြစ်ပွားခြင်း ဖြစ်သည်ဟု ယင်း သတင်းရင်းမြစ်က ဆိုသည်။

တိုက်ပွဲများအတွင်း မော်တာကျည် ပစ်ခတ်မှုများ၊ ဒရုန်းတိုက်ခိုက်မှုများအပြင် တိုက်လေယာဉ်တစ်စင်းဖြင့် ပစ်ခတ်ခြင်းများပါ ရှိသည်ဟု သတင်းရင်းမြစ်အရ သိရသည်။

KA ၏ တိုက်ခိုက်မှုကြောင့် မြန်မာစစ်တပ်က လက်နက်နှင့် ရိက္ခာ ပေးပို့ရာတွင် အသုံးပြုသည့် ထရပ်ကား သုံးစင်း ပျက်စီးသည်ဟုလည်း သတင်းရင်းမြစ်က ပြောသည်။ မြန်မာနိုင်ငံတွင်းက တိုက်ပွဲများမှ ဘေးလွတ်ရာ ခိုလှုံရန် ကြိုးစားလာသူ ၉,၀၃၃ ဦးကို မယ်ဟောင်ဆန်ပြည်နယ်ရှိ ယာယီခိုလှုံရေးစခန်း ငါးခုတွင် လက်ခံထားသည်။

ခိုလှုံရေးစခန်း သုံးခုမှာ မယ်ဟောင်ဆန်ခရိုင်တွင် တည်ရှိပြီး ခွန်ယုအမ်းနှင့် မောင်းခရိုင်တို့တွင် တစ်ခုစီ တည်ရှိသည်။