ကရင်ပြည်နယ်၊ ကြာအင်းဆိပ်ကြီးမြို့နယ်ကို ယနေ့ဇွန်လ၂ရက်နေ့နံနက်ပိုင်းတွင် စစ်ကောင်စီတပ်က လေကြောင်းမှ ပစ်ခတ်တိုက်ခိုက်ခဲ့ခြင်းကြောင့် သံဃာတစ်ပါးပျံလွန်တော်မူပြီးအရပ်သားနှစ်ဦးသေဆုံးကာ ခြောက်ဦးထက်မနည်း ဒဏ်ရာရခဲ့ကြောင်း ဒေသခံများကပြောသည်။
ကြာအင်းဆိပ်ကြီးမြို့နယ်၊ အမှတ်၃ရပ်ကွက်ရှိ မဏိရတနာစာသင်တိုက်၊ အမှတ်၆ရပ်ကွက်နှင့် အမှတ်၁ရပ်ကွက်တို့ကို စစ်ကောင်စီတပ်က Mi35တိုက်ခိုက်ရေးရဟတ်ယာဉ်ဖြင့် ယနေ့ နံနက် ၇နာရီ ၄၀မိနစ်ခန့်တွင် ပစ်ခတ်သွားခြင်းဟု ဒေသခံများကပြောသည်။ ထိုပစ်ခတ်မှုကြောင့် မဏိရတနာစာသင်တိုက်မှ သံဃာတစ်ပါး ဒဏ်ရာရပြီးပျံလွန်တော်မူကာ အရပ်သားနှစ်ဦးလည်း သေဆုံးခဲ့သည်ဟု သိရသည်။
" ဒီမှာက အရပ်သားတွေပဲရှိတာ။ စစ်တပ်က သူတို့အထိနာရင် အရပ်သားကိုပစ်မှတ်ထားနေတာတော့ အဆိုးဆုံးပဲ။ အခု အရပ်သားတွေသေတယ်။ ဒဏ်ရာတွေရကုန်ပြီး ထွက်ပြေးလို့လဲမရဘူး"ဟု ကြာအင်းဆိပ်ကြီးမြို့မှ ဒေသခံတစ်ဦးကပြောသည်။
စစ်ကောင်စီတပ်က လေကြောင်းမှ ပစ်ခတ်သည့်အပြင် ကြာအင်းဆိပ်ကြီးမြို့နယ်နှင့် အနီးဝန်းကျင်ရှိ ပေါင်းဦးချောင်း၊အလယ်ရွာ၊ချောင်းဝ၊အောင်ချမ်းသာကျေးရွာများကို လက်နက်ကြီးများဖြင့်ပစ်ခတ်ခဲ့သည်ဟု သိရသည်။
“ ကြာအင်းဆိပ်ကြီးနားမှာ တိုက်ပွဲဖြစ်နေတာရှိတယ်။ မြို့ထဲမှာ PDFတွေရောက်နေတယ်ဆိုပြီး လက်နက်ကြီးရော ရဟတ်ယာဉ်ပါသုံးပြီး ပစ်ချနေတာ"ဟု ဒေသခံတစ်ဦးက ဆက်ပြောသည်။
ယနေ့ဇွန်လ၂ရက်နေ့ နံနက်၅နာရီဝန်းကျင်တွင် ကြာအင်းဆိပ်ကြီးမြို့နယ်အနီး စစ်ကောင်စီတပ်နှင့် KNU/KNLA၊ တော်လှန်ရေးပူးပေါင်းတပ်ဖွဲ့တို့ တိုက်ပွဲဖြစ်ပွားခဲ့သည်။ စစ်ကောင်စီတပ်ဘက်မှ ထိခိုက်ကျဆုံးမှုများခဲ့ပြီးနောက် လေကြောင်းနှင့် လက်နက်ကြီးများ အသုံးပြုတိုက်ခိုက်ခြင်းဟု မြေပြင်သတင်းအရင်းအမြစ်များထံမှ သိရသည်။
စစ်ကောင်စီတပ်သည် ပြီးခဲ့သည့်မေလ ၂၈ ရက်နေ့ ညကလည်း ကော့ကရိတ်မြို့နယ် မြောက်ပိုင်း၊ သုံးထပ်ကွေ့ဝါးစခန်းစေတီကုန်းကို ပေါင် ၅၀၀ ဗုံးအသုံးပြု၍ လေကြောင်းမှတိုက်ခိုက်ခဲ့သည်။ ထိုတိုက်ခိုက်မှုတွင် ဘုန်းကြီးကျောင်းအတွင်း မည်သူမျှ မရှ်ိ၍ ထိခိုက်ဒဏ်ရာရခြင်းမရှိခဲ့ဟု ဒေသခံများကပြောသည်။
စာတည်း - မောင်ကြီး
